निवडणूक वाहनभाडे सहा महिने थकीत
सकाळ वृत्तसेवा
दापोली, ता. ६ ः जिल्हा परिषद व पंचायत समिती निवडणुकीसाठी वाहने उपलब्ध करून देणाऱ्या दापोलीतील वाहन चालक-मालकांना सहा महिने उलटूनही भाडे मिळालेले नाही. वारंवार पाठपुरावा करूनही देयक न मिळाल्याने चालक-मालकांनी तहसीलदारांकडे निवेदन देत तातडीने रक्कम अदा करण्याची मागणी केली आहे.
जिल्हा परिषद व पंचायत समिती सार्वत्रिक निवडणुकीसाठी ५ ते ७ फेब्रुवारी २०२६ या कालावधीत दापोली तालुक्यातील अनेक वाहनचालक-मालकांनी प्रशासनाला वाहने उपलब्ध करून दिली होती; मात्र, निवडणूक होऊन सहा महिने उलटूनही वाहनभाडे मिळाले नसल्याने चालक-मालक आर्थिक अडचणीत सापडले आहेत. निवडणुकीदरम्यान इंधन, वाहनांची देखभाल आणि इतर खर्च भागवण्यासाठी अनेकांना कर्ज अथवा उसनवारी करावी लागली होती. वेळेत देयक मिळेल, या अपेक्षेवर त्यांनी खर्च केला; मात्र भाड्याची रक्कम अद्याप न मिळाल्याने कर्जाचा बोजा वाढला असून, कुटुंबाचा उदरनिर्वाहही कठीण झाल्याचे त्यांनी निवेदनात म्हटले आहे. गेल्या सहा महिन्यांपासून संबंधित कार्यालयांकडे पाठपुरावा करूनही केवळ आश्वासने मिळत असल्याचा आरोप चालक-मालकांनी केला आहे.