चिपळुणात अंड्यांच्या दरात वाढ
सकाळ वृत्तसेवा
चिपळूण, ता. १० : तालुक्यात गेल्या काही दिवसांपासून अंड्यांच्या दरात अचानक वाढ झाली आहे. प्रति अंड्यामागे सुमारे दोन रुपयांची वाढ झाल्याने सर्वसामान्य ग्राहकांसह हॉटेल व्यावसायिक व किरकोळ विक्रेत्यांना चांगलाच फटका बसत आहे.
सकाळच्या नाश्त्यापासून ते उपाहारगृहे आणि बेकरी व्यवसायापर्यंत अंड्यांचा मोठ्या प्रमाणावर वापर केला जातो. त्यामुळे ही दरवाढ थेट दैनंदिन खर्चावर परिणाम करणारी ठरली आहे. वाहतूकखर्चात झालेली वाढ, कोंबड्यांच्या खाद्याच्या वाढलेल्या किमती, उत्पादन खर्चातील वाढ आणि बाजारातील बदलता पुरवठा यामुळे घाऊक बाजारातच अंडी महागल्याचे स्थानिक विक्रेत्यांकडून सांगण्यात येत आहे. घाऊक बाजारातूनच वाढीव दराने माल मिळत असल्याने किरकोळ विक्रेत्यांनाही दर वाढवणे भाग पडत आहे. या दरवाढीमुळे ऑम्लेट, बुर्जीसारख्या अंड्यांच्या खाद्यपदार्थांचे दर वाढण्याची शक्यता हॉटेल व्यावसायिकांनी व्यक्त केली आहे.
दरम्यान, अंड्यांच्या किमतीतील ही तेजी काही दिवस कायम राहणार की, पुरवठा सुरळीत झाल्यानंतर दर पूर्ववत होणार, याकडे ग्राहकांचे लक्ष लागले आहे.