रत्नागिरीत मासळीची आवक घटली
वातावरणाचा परिणाम; जाळ्यांचे होतेय नुकसान
सकाळ वृत्तसेवा
रत्नागिरी, ता. २४ : पावसाळी मासेमारी बंदी संपल्यानंतर मच्छीमार नौकांच्या मासेमारीचे पहिले काही दिवस चांगले गेले; मात्र, त्यानंतर समुद्रातील वातावरण खवळलेले असल्याने अनेक नौका समुद्रात मासेमारीसाठी जाऊ शकलेल्या नाहीत. ज्या नौका समुद्रात मासेमारीसाठी गेल्या त्यांना पुरेशी मासळी न मिळाल्याने मासळीचे दर वधारले आहेत.
पावसाळी मासेमारी बंदी १ ऑगस्ट रोजी संपली तर, राज्याच्या हद्दीत १५ ऑगस्ट पासून मासेमारीला सुरुवात झाली. नौका मासेमारीसाठी समुद्रात जाऊ लागल्या आहेत; मात्र लगेचच वातावरणातील बिघाडामुळे हवामान विभागाने धोक्याचा इशारा दिला होता. त्यामुळे नौका बंदरातच उभ्या आहेत. समुद्रात उंच लाटा पाहायला मिळत आहेत. समुद्रात टाकलेल्या जाळ्यात मासे मिळत नसल्याने मच्छीमारांना रिकामे माघारी परतावे लागते. तसेच पाण्याला प्रचंड करंट असल्याने जाळ्यांचे नुकसान होत आहे. त्यामुळे मासेमारीत अडथळे निर्माण झालेले आहेत. काही मच्छीमारांना केंड माशाव्यतिरिक्त इतर चविष्ट मासळी फारच कमी प्रमाणात मिळत आहे. केंड मासा फिशमिल कंपन्यांना विकला जातो. काही मच्छीमारांच्या जाळ्यात लेप जातीचा मासा बऱ्यापैकी मिळाला आहे. खवय्यांना आवडणारी मासळी मिळालीच नसल्याने मार्केटमध्ये आलेल्या माशांचे दर चढे आहेत. यामध्ये पापलेटचा किलोचा दर १ हजार रुपये इतका होता. लहान सुरमई ६०० रुपये किलो दराने मिळत होत्या. बांगडा १३० ते १५० रुपये तर सौंदाळा आकारानुसार ३०० ते ३५० रुपये दराने विकला जात होता. लहान कोळंबीचा १ किलोचा दर २५० रुपये तर मोठ्या कोळंबीचा दर ४०० रुपये इतका होता.
---
मागणीवरही परिणाम
श्रावण महिना हा व्रतवैकल्यांचा म्हणून ओळखला जातो. या कालावधीत मांसाहार केला जात नाही. गावागावामध्ये मंदिरात सप्ते, धार्मिक कार्यक्रमांचे आयोजन सुरू आहे. त्यामुळे मासळीच्या मागणीवरही काही प्रमाणात परिणाम झालेला आहे.