मुंबई-मडगाव ‘वंदे भारत’ २० डब्यांची करा
कोकणातील रेल्वे प्रवाशांची रेल्वे बोर्डाकडे मागणी

सकाळ वृत्तसेवा
मुंबई, ता. २८ : मुंबई-मडगाव मार्गावर धावणाऱ्या ‘वंदे भारत’ एक्स्प्रेसची वाढणारी प्रवासी संख्या लक्षात घेता या गाडीतील डब्यांची संख्या २० पर्यंत वाढवावी, अशी मागणी कोकण विकास समितीने रेल्वे बोर्डाकडे केली आहे. सध्या ही गाडी केवळ आठ डब्यांसह धावत असल्याने अनेक प्रवाशांना आरक्षण मिळण्यात अडचणी येत असल्याचे समितीने नमूद केले आहे.
कोकण विकास समितीचे जयवंत शंकर दरेकर यांनी रेल्वे मंडळाला पाठवलेल्या निवेदनात म्हटले आहे, की ही रेल्वेगाडी सुरू झाल्यापासून प्रवाशांचा मोठा प्रतिसाद आहे; मात्र इतकी लोकप्रिय सेवा असूनही ती अजूनही केवळ आठ डब्यांपुरती मर्यादित आहे. अन्य ‘वंदे भारत’ रेल्वेगाड्या ९० टक्क्यांहून अधिक प्रवासीभार असताना १६ किंवा २० डब्यांसह चालवल्या जात आहेत. त्यामुळे मुंबई-मडगाव ‘वंदे भारत’ एक्स्प्रेसचीही क्षमता वाढवणे आवश्यक असल्याचे समितीने नमूद केले आहे.