२५३९५

हरी कृष्णा समूहातर्फे
योग दिन उत्साहात
मुंबई, ता. २३ : हरी कृष्णा ग्रुप प्रायव्हेट लिमिटेड यांच्यातर्फे आंतरराष्ट्रीय योग दिवस उत्साहात झाला. याप्रसंगी देशातील ‘हरी कृष्णा समूहा’च्या सात हजारांहून अधिक कर्मचाऱ्यांनी योगतज्ज्ञांच्या नेतृत्वाखाली योग प्रात्यक्षिके केली. यामध्ये सुरत मुख्यालयातील एक हजार ७०० हून अधिक कर्मचारी, मुंबई कार्यालयातील ६०० कर्मचारी, तसेच १८ राज्यांमधील पाच हजारहून अधिक कर्मचाऱ्यांचा समावेश होता. त्याचबरोबर ‘हरी कृष्णा समूहा’च्या परदेशातील कार्यालयांमधील कर्मचाऱ्यांनीही भाग घेतला.
यावेळी हरी कृष्णा ज्वेलरीचे व्यवस्थापकीय संचालक घनश्याम ढोलकिया म्हणाले, ‘योग केवळ शारीरिक दिनचर्या नाही. योग आपल्याला आठवण करून देतो, की आपल्या जीवनात शांती अंतर्मनातून सुरू होते. आमचा असा विश्‍वास आहे, की शांत मन हे स्पष्ट निर्णय घेण्यास मदत करते.’
हरी कृष्ण एक्स्पोर्टचे मुख्य कार्यकारी अधिकारी पिंटू ढोलकिया म्हणाले, ‘योग आपले शरीर शुद्ध करते. तुमचे मन शांत करते आणि तुमच्या जीवनात मानसिक विश्रांती आणते. सातत्यपूर्ण योगसाधना आपल्याला निरोगी जीवन जगण्यासदेखील मदत करते. योग साधनेला जागतिक स्तरावर पोहोचविल्याबद्दल बाबा रामदेव आणि पंतप्रधान नरेंद्र मोदी यांचे आभार मानले पाहिजेत.’