व्यावसायिक दृष्टिकोनातून मोदक कार्यशाळा
महाराष्ट्राच्या लाडक्या गणपती बाप्पांच्या उत्सवाची सगळेजण आतुरतेने वाट पाहात आहेत. या काळात मोदकांची मागणी वाढलेली असते. या पार्श्वभूमीवर बाप्पांना आवडणारा मोदक सिक्रेट टिप्स व ट्रिक्ससह तयार करण्याची कृती प्रात्यक्षिकांसहित करून दाखवणारी व मोदक व्यवसाय करू इच्छिणाऱ्यांना तो कसा सुरू करावा, याचे मार्गदर्शन करणारी कार्यशाळा २७ जुलै रोजी आयोजित केली आहे. यामध्ये मोदक व्यवसायातील संधी व त्यासाठी विविध प्रकारचे नावीन्यपूर्ण मोदक कसे तयार करावेत, याचे प्रशिक्षण घेतले जाणार आहे. मोदक तयार करण्याची व्यावसायिक पद्धत, प्रिजर्वेशनच्या पद्धती, बाजारपेठेतील संधी, नफा, पॅकिंग, लेबलिंग आदींबाबत मार्गदर्शन केले जाणार आहे. कार्यशाळेत खवा, मँगो, केशर, गुलकंद, पान, शुगर फ्री, चॉकलेट, खारे, ड्रायफ्रूट, तळणीचे व उकडीचे इत्यादी मोदकांचे प्रकार शिकवले जातील.
संपर्क : ८४८४८११५४४

शंख साधना कार्यशाळा
भारतीय संस्कृतीमध्ये शंख व त्याच्या ध्वनीला पावित्र्य आहे. ही एक खूप प्राचीन साधना आहे. शंख साधनेद्वारे श्वासोच्छवास लांब होतात व दम्यासारखे श्वसनाचे व थायरॉईड, रक्तदाब, मधुमेह संबंधित आजार बरे होतात, असा अनेकांचा अनुभव आहे. ज्या व्यक्ती धूम्रपान करतात त्यांनी नियमित शंख साधना केल्यास धूम्रपानाचे व्यसन दूर होते. नियमित योगसाधना करणाऱ्यांनी शंखसाधना केल्यास अंतःकरण अधिक शुद्ध होण्यास मदत होते. मुली आणि महिलाही ही साधना करू शकतात. या पार्श्वभूमीवर २७ जुलै रोजी शंख साधनेविषयी प्रात्यक्षिकासह माहिती देणारी कार्यशाळा आयोजित केली आहे. यामध्ये शंख व सनातन धर्म, शंखाचे प्रकार, शंखाची नैसर्गिक निर्मिती, शंख नाद, शरीर व योग यांची माहिती व शंख नादाचे प्रात्यक्षिक प्रशिक्षण होणार आहे.
संपर्क : ८४८४८११५४४

शेवगा लागवड, उत्पादन व निर्यात संधी
स्थानिक तसेच आंतरराष्ट्रीय बाजारात नियमित मागणी असणाऱ्या शेवग्याचा आयुर्वेद औषधींमध्येही वापर वाढला आहे. शेवगा पिकाच्या आधुनिक लागवड पद्धती, पीक व्यवस्थापन व निर्यात व्यवस्थापनाबाबत माहिती करून देणारी कार्यशाळा ३ ऑगस्ट रोजी आयोजित केली आहे. कार्यशाळेत निर्यातक्षम शेवगा उत्पादन पद्धती, आधुनिक जाती, खत व पाणी व्यवस्थापन, छाटणी, फुलोरा अवस्था, काढणी व्यवस्थापन, निर्यातीच्या संधी, निकष, ट्रेसिबिलिटी, शेवगा निर्यातीसाठी गुणवत्तेची पडताळणी, शेवगा निर्यातीसाठी परकीय बाजारपेठ, निर्यातीसाठी शेंगांचा देठ किती व कसा ठेवावा, रसायनमुक्त उत्पादन, निर्यातीसाठी कागदपत्रांची पूर्तता, देशनिहाय निर्यातीचे नियम आदी संदर्भात नामवंत तज्ज्ञ मार्गदर्शन करणार आहेत.
संपर्क : ८४८४८११५४४