आयसीसी क्रिकेट वर्ल्डकपच्या अंतिम सामन्याला आता अवघे काही दिवस शिल्लक आहेत. रविवार 19 नोव्हेंबर रोजी अहमदाबादमधील नरेंद्र मोदी स्टेडियमवर फायनल मॅच होणार आहे. भारत आणि ऑस्ट्रेलियामध्ये होणारा अंतिम सामना याचि देही याचि डोळा पाहण्यासाठी लाखो लोक उत्सुक आहेत. यामुळे अहमदाबाद शहरातील हॉटेल्सचे दर मात्र गगनाला भिडले आहेत.

आधीच सामन्याची तिकिटं मिळवणं हे मोठं आव्हान आहे. मात्र, कित्येक फॅन्सच्या अडचणी तिकीट मिळूनही संपत नसल्याचं दिसत आहे. कारण अहमदाबादमधील हॉटेल्सचे दर महाग म्हणण्याच्याही पुढे गेले आहेत. एरवी 500-700 रुपये प्रतिदिन एवढं भाडं असणाऱ्या हॉटेलचे दरही तब्बल 10,000 रुपयांपर्यंत पोहोचले आहेत. तर लक्झरी हॉटेलचे दर एका दिवसासाठी सुमारे एक लाख रुपयांपर्यंत पोहोचले आहेत.

प्रवासही महागला

अहमदाबादला पोहोचणं देखील क्रिकेट फॅन्ससाठी अवघड झालं आहे. दिल्ली ते अहमदाबाद विमान तिकिटाची किंमत 15,000 रुपये एवढी झाली आहे. तर मुंबईमधून अहमदाबादला जाणाऱ्या कित्येक खासगी बसचे भाडे देखील महागले आहे. अर्थात, यामुळे नियमित प्रवास करणाऱ्या लोकांना देखील मोठा फटका बसत आहे. (Sports News)

पहिली वेळ नाही

क्रिकेट मॅचमुळे शहरातील हॉटेल्सचे दर वाढण्याची ही पहिली वेळ नाही. यापूर्वी 15 ऑक्टोबर रोजी झालेल्या भारत-पाकिस्तान सामन्यावेळी देखील असाच प्रकार पहायला मिळाला होता. त्यातूनच धडा घेत अंतिम सामन्यासाठी कित्येक फॅन्सनी अ‍ॅडव्हान्स बुकिंग सुरू केलं होतं.