Babar Azam New T20i World Record : पाकिस्तानने दुसऱ्या टी-20 सामन्यामध्ये न्यूझीलंडचा 38 धावांनी पराभव करत मालिकेत 2-0 अशी आघाडी घेतली आहे. यासोबत बाबर आझमने दुस-या टी-20 मध्ये विश्वविक्रम केला. टी-20 इंटरनॅशनलमध्ये बाबरने कारकिर्दीतील तिसरे शतक ठोकून धमाका केला.

बाबरने 58 चेंडूत 101 धावांची नाबाद खेळी खेळली, त्याच्या डावात बाबरने 11 चौकार आणि 3 षटकार मारले. त्याचा स्ट्राईक रेट 174.14 होता. अलीकडच्या काळात बाबरच्या स्ट्राईक रेटबद्दल बरीच चर्चा होत आहे.

बाबरच्या खेळीच्या जोरावर पाकिस्तानने 20 षटकांत 4 गडी गमावून 192 धावा केल्या, त्यानंतर न्यूझीलंडचा संघ 20 षटकांत 7 गडी गमावून 154 धावाच करू शकला. पाकिस्तानी गोलंदाजांनी पुन्हा एकदा कहर केला.

रोहित शर्माने टी-20 मध्ये सर्वाधिक शतके झळकावली आहेत. रोहितने 4 शतके झळकावली आहेत. त्याचबरोबर आता बाबरने 3 शतके झळकावून आगामी काळात तो रोहितचा टी-20 आंतरराष्ट्रीय विक्रम मोडीत काढू शकतो. त्याचबरोबर सूर्यकुमार यादव, कॉलिन मुनरो, एस डेविजी, ग्लेन मॅक्सवेल या खेळाडूंनी आतापर्यंत 3 शतके झळकावली आहेत.

टी-20 मध्ये 3 शतके झळकावणारा बाबर जगातील पहिला कर्णधार ठरला आहे. त्याच्याशिवाय अन्य कोणत्याही कर्णधाराने टी-20 मध्ये 3 शतके झळकावलेली नाहीत. यापूर्वी बाबरने 2021 साली दक्षिण आफ्रिकेविरुद्ध, त्यानंतर 2022 मध्ये इंग्लंडविरुद्ध टी-20 आंतरराष्ट्रीय सामन्यात शतक झळकावण्याची अप्रतिम कामगिरी केली होती. रोहितने कर्णधार म्हणून T20 आंतरराष्ट्रीय सामन्यात 2 शतके झळकावली आहेत.

आता बाबर टी-20 मध्ये सर्वाधिक शतके ठोकणारा दुसरा फलंदाज ठरला आहे. बाबरने टी-20 मध्ये एकूण 9 शतके झळकावली आहेत. त्याचबरोबर ख्रिस गेलने टी-20 मध्ये एकूण 22 शतके झळकावली आहेत. न्यूझीलंडविरुद्ध टी-20 आंतरराष्ट्रीय सामन्यात शतक झळकावणारा बाबर हा पहिला पाकिस्तानी फलंदाज आहे.