India Vs Australia t20 World Cup 2024 : भारत यंदाच्या टी 20 वर्ल्डकपमधील आपला शेवटचा सुपर 8 चा सामना खेळणार आहे. हा सामना ऑस्ट्रेलियाविरूद्ध डॅरेल सॅमी स्टेडियमवर होणार आहे. ऑस्ट्रेलियाने आपला गेला सामना हरल्यामुळे आता त्यांच्यासाठी करो या मरो स्थिती आहे. अफगाणिस्तानने त्यांचा पराभव केला होता. त्यामुळे सेमी फायनल गाठण्यासाठी ऑस्ट्रेलियाला भारताचे आव्हान पार करावे लागणार आहे.

भारताने यंदाच्या टी 20 वर्ल्डकपमध्ये आतापर्यंत 5 सामने खेळले आहेत. या पाच सामन्यात भारताने फक्त एकाच खेळाडूला चेंज केलं आहे.

कुलदीप यादव बाहेर जाणार?

भारतीय संघाने खेळपट्टी आणि परिस्थिती पाहून आपल्या संघात बदल केला आहे. अमेरिकेतील सामन्यांमध्ये भारत तीन वेगवान गोलंदाज घेऊन मैदानावर उतरली. त्यावेळी प्लेईंग 11 मध्ये मोहम्मद सिराज खेळला होता. कुलदीप यादवला प्लेईंग 11 मध्ये स्थान मिळालं नव्हतं.

मात्र आता गेले दोन सामने भारतीय संघ वेस्ट इंडीजमध्ये खेळत असल्याने फिरकीपटू कुलदीप यादवला प्लेईंग 11 मध्ये संधी देण्यात आली असून मोहम्मद सिराज बेंचवर आहे. आता भारतीय संघ ग्रॉस आईलेट येथील डॅरेल सॅमी स्टेडियमवर खेळणार आहे.

या स्टेडियमवर देखील फिरकीला साथ देणारी खेळपट्टी असल्याचं दिसून आलं आहे. त्यामुळे कुलदीप यादवची प्लेईंग 11 मधील जागा निश्चित आहे. त्याने गेल्या दोन सामन्यात 5 विकेट्स घेतल्या आहेत. हार्दिक पांड्या हा तिसरा वेगवान गोलंदाज म्हणून चांगली कामगिरी करत आहे. त्यामुळे सध्या तरी सिराजला संधी मिळेल असे दिसत नाहीये.

संघात होणार नाही कोणताही बदल

भारतीय संघाच्या प्लेईंग 11 मध्ये कोणताही बदल होण्याची शक्यता नाही. कारण संघातील सर्व फलंदाज सेटल असून ते संधी मिळताच धावा करत आहेत. रोहित शर्मा, विराट कोहली, ऋषभ पंत, हार्दिक पांड्या सूर्यकुमार यादव, अक्षर पटेल यांनी धावा केल्या आहेत.

दुसरीकडे फिरकीपटू म्हणून रविंद्र जडेजा, अक्षर पटेल आणि कुलदीप यादव यांचा देखील जम बसला आहे. या मैदानावर आफ्रिका विरूद्ध इंग्लंड सामन्यात फिरकीपटूंनी 12 षटकात 4 विकेट्स घेतल्या होत्या.

भारताची संभाव्य प्लेईंग 11 :

रोहित शर्मा (कर्णधार), विराट कोहली, ऋषभ पंत, सूर्यकुमार यादव, शिवम दुबे, हार्दिक पांड्या, रविंद्र जडेजा, अक्षर पटेल, अर्शदीप सिंग, कुलदीप यादव, जसप्रीत बुमराह

(Cricket News In Marathi)