India vs Ireland T20 World Cup 2024 : सगळेच वातावरण जरा वेगळे आहे. नेहमी आम्ही वर्ल्डकपसारख्या स्पर्धेला येतो तेव्हा भल्यामोठ्या स्टेडियमवर सराव आणि सामने होतात. आत्ताच्या घडीला एका पार्कमध्ये आम्ही सराव करत आहोत. शांत वातावरण आहे, सगळेच जरा वेगळे आहे, असे भारतीय संघाचा प्रशिक्षक राहुल द्रविड सांगत होते.

टी-२० क्रिकेट प्रकारात कोणताच संघ कमजोर मानता येत नाही. त्यातून आयर्लंड संघाला भरपूर अनुभव आहे. टी-२० सामने खेळायचा म्हणून आम्ही त्यांना कमजोर मानायचा कणभरही प्रश्न येत नाही. चर्चा करताना आम्ही इतकेच एकमेकांना बजावत आहोत की स्थानिक वातावरण, खेळपट्टी सगळेच दोनही संघांसाठी एकसारखे आहे. मग त्या वातावरणाशी जुळवून घेता यायला हवे, असे द्रविड यांनी सांगितले.

आम्ही अगोदरच्या सामन्यात कशी खेळपट्टी होती याचा जास्त विचार करणार नाही, कारण भारताच्या सामन्यासाठी कदाचित वेगळी खेळपट्टी असेल ज्याचा स्वभाव वेगळा असेल. त्या त्या वेळची परिस्थिती बघून खेळात बदल करून सामन्यात परिणाम साधणारा खेळ करता यायला हवा, असे माझे मत आहे, राहुल द्रविड म्हणाले.

संघ जाहीर केला नसला तरी आम्हाला कल्पना आहे की, ११ जणांच्या यादीत कोणाची नावे असणार? सामन्याच्या दिवशी खेळपट्टीचा अंदाज घेऊन एखादा बदल केला तरच नाहीतर सगळे पक्के आहे, द्रविड यांनी हसत हसत भरवसा दिला.