Rahul Dravid T20 World Cup 2024 : भारताच्या टी 20 वर्ल्डकप विजेत्या संघाचा मुख्य प्रशिक्षक राहुल द्रविडने 11 वर्षानंतर आयसीसी ट्रॉफी जिंकल्याबद्दल मला खूप अभिमान असल्याचं सांगितले. राहुल द्रविडच्या नावावर यापूर्वी कधीही वर्ल्ड चॅम्पियनचा टॅग लागला नव्हता. मात्र प्रशिक्षक म्हणून आता त्याच्या नावावर टी 20 वर्ल्डकपचे विजेतेपद असणार आहे.

दरम्यान, पीटीआयशी बोलताना द्रविड म्हणाला की, 'गेल्या काही तासांपासून माझ्याकडे बोलण्यासाठी शब्द कमी पडत आहेत. मला या संघाचा खूप अभिमान आहे. ते अवघड परिस्थितीत देखील झुंजारपणा दाखवत लढले. आजचा सामना देखील खूप परीक्षा पाहणारा होता. संघाने पहिल्या सहा षटकातच तीन विकेट्स गमावल्या होत्या. आम्ही अवघड परिस्थितीत पोहचलो होतो. मात्र संघानं शेवपर्यंत फाईट दिली, आपला विश्वास ढळू दिला नाही.'

राहुल द्रविडने भारतीय संघ इथून पुढे देखील आपली दमदार कामगिरी सुरू ठेवेल असा विश्वास व्यक्त केला. तो म्हणाला की, 'या संघातील क्षमता आणि गुणवत्ता जबरदस्त आहे. एक क्षण असं वाटलं की सगळा जोर लावूनही आपण ही ट्रॉफी जिंकू शतक नाही. मात्र आज मी विश्वासानं सांगू शकतो की हा संघ त्यांची चांगली कामगिरी पुढे देखील सुरू ठेवेल अन् अनेक ट्रॉफी जिंकेल.'

राहुलने आपली मुलाखत एका हास्यविनोद करत संपवली. तो म्हणाला, 'मी या विजयी जल्लोषाच्या वातावरणातून लवकरच बाहेर पडणार आहे. कारण मी पुढच्या आठवड्यात बेरोजगार असणार आहे. मी फार पुढचा विचार करत नाहीये. मात्र आशा आहे की मी यातून बाहेर येईन. मला वाटतं आयुष्य म्हणजे हे असच असतं.'