Ritika Sajdeh Instagram Story : भारतीय संघाने बार्बाडोसमध्ये टी 20 वर्ल्डकपची फायनल जिंकली अन् तब्बल 13 वर्षांनी वर्ल्डकपवर आपलं नाव कोरलं. ट्रॉफीसह टीम इंडियाचे स्वागत करण्यासाठी सर्व क्रिकेट चाहते उत्सुक असताना बार्बाडोसमधील वादळामुळे टीम हॉटेल रूममध्येच अडकून पडली. बार्बाडोसच्या सरकारने विमानतळच बंद केलं होतं.

आज टीम इंडिया विशेष विमानाने मायदेशासाठी रवाना झाली आहे. भारतीय संघ चार जुलैला टीम इंडिया भारतात दाखल होणार आहे. दरम्यान, रोहित शर्माची पत्नी रितिका देखील या वादळामुळे अडकून पडली होती. तिने या वादळाची काही विदारक दृष्ये आपल्या इन्स्टाग्राम स्टोरीवर ठेवली.

रितिकाने आपल्या इन्स्टा स्टोरीवर मृत माशाचा आणि कासवाच्या अंड्यांचा फोटो शेअर केला आहे. या फोटोंवरून या वादळाचा समुद्रातील जीवांवर झालेला परिणाम दिसून येतो.

गेल्या तीन दिवसांपासून बार्बाडोसमध्ये वादळी वाऱ्यासह तुफान पाऊस पडत आहे. दरम्यान, वादळाची तीव्रता कमी झाल्यावर आज (3 जुलै) एअर इंडियाच्या विशेष विमानाने भारतीय संघ मायदेशात परतण्यासाठी रवाना झाले आहेत. या विमानात भारतीय संघ, सपोर्ट स्टाफ, कोचिंग स्टाफ याचबरोबर खेळाडूंचे नातेवाईक आणि बार्बाडोसमध्ये अडकलेले पत्रकार यांचा देखील समावेश आहे. हे सर्व एकाच विमानाने परत येत आहेत.

भारतीय संघाला घेऊन येणारे विमान 4 जुलै सकाळी 6 वाजता भारतात दाखल होईल. त्यानंतर 11 वाजता टीम इंडिया पंतप्रधान नरेंद्र मोदींची भेट घेणार आहे. तिथे नाष्टा केल्यानंतर विशेष विमानाने भारतीय संघ मुंबईत दाखल होईल. मुंबईत दाखल झाल्यानंतर नरिमन पॉईंट ते वानखेडे स्टेडियम अशी मिरवणूक देखील आयोजित केली आहे. वानखेडेवर खेळाडूंना 125 कोटी रूपयांच्या बक्षीस रक्कमेचे वितरण केले जाणार आहे.