टी२० विश्वचषक स्पर्धेला १७ ऑक्टोबरपासून सुरूवात झाली आहे. १७ ते २२ ऑक्टोबर या दरम्यान पात्रता फेरीचा सामने रंगले आहेत. या फेरीत दोन गटात सामने खेळवले जात असून दोन्ही गटातील सर्वोत्तम दोन-दोन संघ पुढील फेरीत खेळण्यास पात्र ठरणार आहे. त्यानंतर २३ ऑक्टोबरपासून मूळ सुपर-१२ स्पर्धेला प्रारंभ होणार आहे. मात्र ही स्पर्धा सुरू होण्याआधीच विंडिजच्या संघाला मोठा धक्का बसला. विंडिजच्या स्टार खेळाडू स्पर्धेतून माघार घेतली असून त्याच्या जागी दुसरा खेळाडू संघात घेण्यात आला आहे.

विंडिजचा संघ हा टी२० विश्वचषक स्पर्धेचा गतविजेता आहे. त्यांना १५ खेळाडूंच्या चमूमध्ये बदल करावा लागला आहे. विंडिजचा अष्टपैलू खेळाडू फॅबियन अ‍ॅलन याच्या घोट्याला दुखापत झाली असल्याने त्याला नाईलाजाने टी२० विश्वचषक स्पर्धेतून माघार घ्यावी लागली आहे. त्याच्या जागी विंडिजच्या संघाने अकील होसेन याला बदली खेळाडू म्हणून १५ जणांच्या चमूत स्थान दिलं आहे. अकील होसेन या टी२० विश्वचषकाच्या संघासोबत राखीव खेळाडू म्हणून युएईत आधीच दाखल झाला होता. त्यामुळे त्याला बदली खेळाडू म्हणून संघा घेण्यास फारसा अडथळा आला नाही.