भारत आणि नामिबिया यांच्यातील सामन्यानंतर भारतीय टी-20 संघाला नवा कर्णधार मिळणार आहे. पुढचा कॅप्टन कोण? अशी चर्चा रंगत असताना खुद्द किंग कोहलीने रोहित शर्माच्या खांदयावर नेतृत्वाची धूरा पडणार असल्याचे संकेत दिले. T20 मध्ये अखेरच्या सामन्यात कॅप्टन्सी करताना कोहलीने नामिबिया विरुद्ध टॉस जिंकला. टॉसनंतर त्याने भारतीय संघाच्या नव्या कर्णधारासंदर्भात मोठा इशारा दिला.

टॉसनंतर विराट कोहली म्हणाला की, भारतीय संघाचे नेतृत्व करणे ही सन्मानाची गोष्ट आहे. संघाचे नेतृत्व करताना सर्वोत्तम देण्याचा प्रयत्न केला. कॅप्टन्सी करण्याची संधी दिल्याबद्दल आभारी आहे. टीमला पुढे घेऊन जाण्यासाठी बदलाची गरज आहे. रोहित इथे आहे तो बऱ्याच काळापासून संघासोबत आहे. भारतीय क्रिकेट चांगल्या हातामध्ये आहे, असे सांगत कोहलीने रोहित शर्माच पुढचा कॅप्टन असल्याचे संकेत दिले. विराट कोहलीसाठी हा 50 वा टी-20 सामना असून कॅप्टन्सीमध्ये त्याचा शेवटचा सामना आहे.

भारत आणि नामिबाया दोन्ही संघांसाठी सेमी फायनलचे दरवाजे बंद झाले आहेत. सुपर 12 च्या दुसऱ्या गटातील या सामन्याने साखळी फेरीतील लढतीचा दि एन्ड होणार आहे. भारतीय संघाला पाकिस्तान आणि न्यूझीलंड विरुद्धचा पराभव चांगलाच महागात पडला. टी-20 वर्ल्ड कप स्पर्धा युएईच्या मैदानात रंगली असली तरी याचे यजमानपद हे भारताकडे आहे. पण भारतीय संघच साखळी फेरीत गारद झाल्याची वेळ आली. कोहलीच्या नेतृत्वाखाली भारतीय संघाने आतापर्यंत एकही आयसीसी स्पर्धा जिंकलेली नाही. 2017 मधील आयसीसी चॅम्पियन्स ट्रॉफीपासून ते टी-20 वर्ल्ड कप स्पर्धेपर्यंत विराटने 4 संधी गमावल्या.