India vs Bangladesh T20I: भारतीय संघ बांगलादेशविरुद्ध दुसरा टी२० सामना दिल्लीतील अरुण जेटली स्टेडियमवर बुधवारी सुरू आहे. या सामन्यात भारताने सुरुवात चांगली केली होती. मात्र, बांगलादेशने पॉवरप्लेमध्ये भारतावर वर्चस्व ठेवले. या सामन्यात बांगलादेशने नाणेफेक जिंकून प्रथम गोलंदाजी करण्याचा निर्णय घेतला होता.

मात्र पहिल्याच षटकात भारताकडून सलामीला फलंदाजीला उतरलेल्या संजू सॅमसन आणि अभिषेक शर्मा यांनी १५ धावा ठोकल्या होत्या. मात्र दुसऱ्या षटकात तस्किन अहमदने चांगली गोलंदाजी केली. त्याने शेवटच्या चेंडूवर सॅमसनला चूक करण्यास भाग पाडले.

संजू सॅमसन तस्किनच्या गोलंदाजीवर नजमुल हुसैन शांतोच्या हातात झेल देत बाद झाला. त्याने ७ चेंडूत १० धावा केल्या. त्याच्यानंतर तिसऱ्या षटकात तान्झिम हसन साकिबने अभिषेक शर्माला क्लिनबोल्ड केले. अभिषेकने ११ चेंडूत १५ धावा केल्या.

त्यानंतरही सूर्यकुमार यादव नितीश रेड्डीच्या साथीने फलंदाजी करताना आक्रमक खेळण्याचा प्रयत्न केला होता. मात्र, सूर्यकुमारचा अडथळा मुस्तफिझुरने दूर केला. त्याने सूर्यकुमारला ६ व्या षटकात शांतोच्या हातून झेलबाद केले. सूर्यकुमार ८ धावा करून माघारी परतला.

त्यामुळे भारताची अवस्था ६ षटकात ३ बाद ४५ धावा अशी झाली. दरम्यान, पहिल्या ६ षटकात म्हणजेच पॉवरप्लेमध्ये भारताने बांगलादेशविरुद्ध टी२० क्रिकेटमध्ये तीन विकेट्स गमावण्याची ही पहिलीच वेळ ठरली.

दरम्यान, या सामन्यासाठी भारताने प्लेइंग इलेव्हनमध्ये बदल केलेला नाही, तर बांगलादेशने प्लेइंग इलेव्हनमध्ये एक बदल केला असून शोरुफुल इस्लामच्या जागेवर तान्झिम साकिबला संधी दिली आहे.

पहिला सामना भारताने जिंकलेला असल्याने हा सामना जिंकून मालिकेत बरोबरी साधण्याचा प्रयत्न बांगलादेशचा असणार आहे. तसेच जर भारताने हा सामना जिंकला, तर ते मालिकाही खिशात घालतील.

असे आहेत प्लेइंग इलेव्हन

• भारत - संजू सॅमसन, अभिषेक शर्मा, सूर्यकुमार यादव, नितीश कुमार रेड्डी, हार्दिक पांड्या, रियान पराग, रिंकु सिंग, वॉशिंग्टन सुंदर, वरुण चक्रवर्ती, अर्शदीप सिंग, मयंक यादव.

• बांगलादेश - परवेझ हुसैन इमॉन, लिटन दास (यष्टीरक्षक), नजमुल हुसेन शांतो (कर्णधार), तौहीद हृदोय, महमुदुल्ला, जाकेर अली, मेहिदी हसन मिराझ, रिशाद हुसेन, तस्किन अहमद, तन्झिम हसन साकिब, मुस्तफिजुर रहमान