Musheer Khan road accident pics : मुंबईचा युवा फलंदाज मुशीर खान याच्या गाडीचा शुक्रवारी उत्तर प्रदेशमध्ये भीषण अपघात झाला. त्यामुळे त्याला आता १६ आठवडे विश्रांतीचा सल्ला डॉक्टरांनी दिला आहे. मुशीर खानला आता १ ऑक्टोबरपासून सुरू होणाऱ्या इराणी चषक सामन्याला आणि रणजी करंडक स्पर्धेच्या काही लढतींना मुकावे लागणार आहे. इंडियन एक्स्प्रेसने दिलेल्या वृत्तानुसार मुशीर, त्याचे वडील नौशाद आणि आणखी दोघं गाडीतून आझमगड येथून लखनौसाठी प्रवास करत होते. त्यांची गाडी डिव्हायडरवर आदळली आणि ३-४ वेळा पटली खाल्ली. यमुना एक्स्प्रेसवे येथे हा अपघात झाला.

मुशीरचे वडील आणि अन्य दोन लोकांना थोडसं खरचटलं आहे, परंतु मुशीरच्या मानेला दुखापत झाली आहे आणि त्याला तातडीने नजीकच्या हॉस्पिटलमध्ये नेण्यात आले आहे. डॉक्टरांनी त्याला १६ आठवड्यांच्या विश्रांतीचा सल्ला दिला आणि कदाचीत त्याच्या मानेला फ्रॅक्चर झाला असावा. पुढील उपचारासाठी तो रविवारी मुंबईत विमानाने परतणार आहे.

''काल रात्री त्याच्या गाडीचा अपघात झाला आणि तो इराणी चषक सामन्यात नाही खेळणार. तो रविवारी मुंबईत येणार आहे. मुंबई क्रिकेट असोसिएशन व भारतीय क्रिकेट नियामक मंडळाची वैद्यकिय टीम त्याच्या दुखापतीची पाहणी करणार आहे. त्यानंतर त्याच्यावर उपचार सुरू होणार आहे,''असे MCA च्या अधिकाऱ्यांनी सांगितले.

मुंबईचा संघ मुंबईहून लखनौच्या दिशेने रवाना झाला आहे आणि मुशीर आझमगडहून संघात दाखल होणे अपेक्षित होते. MCA ने मुशीरला मुंबईत येण्यास सांगितले होते, परंतु त्याच्या वडिलांनी त्याला आझमगड येथे सराव करता यावा, यासाठी विनंती केली होती. मुंबईच्या संघ व्यवस्थापनाने ही विनंती मान्य केली.

रणजी करंडक स्पर्धेचा गतविजेता मुंबईचा संघ १ ते ५ ऑक्टोबर या कालावधीत शेष भारताविरुद्ध खेळणार आहे. मुंबईच्या संघाने अजून मुशीरच्या जागी कोणाची निवड केलेली नाही. मुशीरने १९ वर्षांखालील वर्ल्ड कप स्पर्धेत भारतासाठी दमदार कामगिरी केली होती. त्यानंतर त्याने रणजी करंडक स्पर्धेत पहिले द्विशतक झळकावले. फायनलमध्ये विदर्भ संघाविरुद्ध त्याने दुसऱ्या डावात शतक झळकावून मुंबईला ४२ वे जेतेपद जिंकून देण्यात मोलाचा वाटा उचलला होता. प्रथम श्रेणी क्रिकेटमध्ये त्याने ५० हून अधिक सरासरीने ७०० हून अधिक धावा केल्या आहेत.