पॅरिस : सर्बियाचा महान टेनिसपटू नोवाक जोकोविच याने फ्रेंच ओपन टेनिस ग्रँडस्लॅमची सुरुवात छान केली. त्याने पुरुष एकेरीच्या सलामीच्या लढतीत अमेरिकेच्या ॲलेक्झँडर कोवासेविच याच्यावर ६-३, ६-२, ७-६ असा विजय साकारला आणि पुढल्या फेरीत प्रवेश केला.

जोकोविच याने पहिला सेट ६-३ व दुसरा सेट ६-२ असा सहज जिंकला. तिसऱ्या सेटमध्येही तो आघाडीवर होता. मात्र कोवासेविच याने जोकोविचची सर्व्हिस मोडीत काढत ६-६ अशी बरोबरी साधली. मात्र टायब्रेकमध्ये जोकोविचने आपला खेळ उंचावला आणि ७-६ अशी बाजी मारली. जोकोविचने ही लढत दोन तास व २६ मिनिटांमध्ये जिंकली.

स्लोएन स्टीफन्स हिने महिला एकेरीच्या लढतीत १६व्या मानांकित कॅरोलिना प्लिस्कोवा हिला पराभवाचा धक्का दिला. स्टीफन्स हिने प्लिस्कोवा हिच्यावर ६-०, ६-४ अशी मात केली. स्टीफन्स हिने एक तास व २४ मिनिटांमध्ये विजय संपादन केला. २०व्या मानांकित मॅडीसन कीज हिने केय कनेपी हिचे कडवे आव्हान ६-१, ३-६, ६-१ असे परतवून लावले.

कॅमेरुनचा झुंजीनंतर विजय

कॅमेरुन नोरी याने पाच सेटच्या कडव्या झुंजीनंतर विजय मिळवला. त्याने बेनॉईट पेअर याला पराभूत केले. कॅमेरुनने पहिला सेट ७-५ असा जिंकला. त्यानंतर मात्र पुढील दोन सेटमध्ये पेअर याने ६-४, ६-३ असे यश संपादन केले. कॅमेरुनने चौथ्या व पाचव्या सेटमध्ये ६-१, ६-४ अशा फरकाने विजय मिळवत झोकात पुनरागमन केले.