ICC Test Rankings Yashasvi Jaiswal : भारताने वेस्ट इंडिजविरुद्धची पहिली कसोटी एक डाव आणि 141 धावांनी जिंकली. आता टीम इंडिया 20 जुलैपासून दुसरा कसोटी सामना खेळण्यासाठी त्रिनिदादच्या पोर्ट ऑफ स्पेनमध्ये उतरणार आहे. दोन कसोटी सामन्यांच्या मालिकेत टीम इंडिया 1-0 ने आघाडीवर आहे.

दरम्यान पहिल्या सामन्यात शतक झळकावणारा कर्णधार रोहित शर्माने आयसीसी कसोटी फलंदाजांच्या क्रमवारीत मोठी झेप घेतली आहे. तो पुन्हा एकदा आयसीसी कसोटी फलंदाजांच्या क्रमवारीतील टॉप-10 मध्ये आला आहे.

वेस्ट इंडिजविरुद्ध आंतरराष्ट्रीय क्रिकेटमध्ये पदार्पण करणारा युवा खेळाडू यशस्वी जैस्वालने आयसीसी क्रमवारीत प्रथमच स्थान मिळवले आहे. तो 73 व्या स्थानावर आहे. यशस्वी जैस्वालने पहिल्या कसोटी सामन्यात 171 धावांची सर्वोत्तम खेळी खेळली होती.

ताज्या क्रमवारीबद्दल बोलायचे झाले तर न्यूझीलंडचा केन विल्यमसन 883 रेटिंगसह पहिल्या क्रमांकाच्या विराजमान आहे. दुसऱ्या क्रमांकावर ट्रॅव्हिस हेड, ज्यांचे रेटिंग आता 874 आहे. बाबर आझम 862 रेटिंगसह तिसऱ्या क्रमांकावर कायम ठेवण्यात यशस्वी ठरला आहे. म्हणजेच मागील आठवड्याच्या तुलनेत टॉप 3 मध्ये कोणताही बदल झालेला नाही.

गेल्या आठवड्यात ऋषभ पंत दहाव्या क्रमांकावर होता, पण आता रोहित शर्मा आला आहे. रोहित शर्माचे रेटिंग 729 वरून 751 वर पोहोचले आहे आणि ऋषभ पंत 750 रेटिंगवर आहे. म्हणजेच, फक्त एका रेटिंग पॉइंटचा फरक आहे. रोहित शर्माने वेस्ट इंडिजविरुद्धच्या पहिल्या सामन्यात 103 धावांची शानदार खेळी केली होती. दुसरीकडे विराट कोहलीबद्दल बोलायचे झाले तर तो 14 व्या क्रमांकावर आहे. गेल्या आठवड्यात त्याचे रेटिंग 700 होते, ते आता 711 पर्यंत वाढले आहे.

कसोटी क्रमवारीत भारताचा रविचंद्रन अश्विन 884 रेटिंगसह अव्वल स्थानावर कायम आहे. यानंतर ऑस्ट्रेलियाचा कर्णधार पॅट कमिन्सचा क्रमांक लागतो. गोलंदाजांच्या कसोटी क्रमवारीत कागिसो रबाडा तिसऱ्या तर जेम्स अँडरसन चौथ्या क्रमांकावर आहे. शाहीन आफ्रिदी पाच नंबर आहे.

यानंतर स्टुअर्ट ब्रॉड आणि रवींद्र जडेजा यांचा क्रमांक लागतो. रवींद्र जडेजाने तीन स्थानांनी झेप घेत थेट सातव्या क्रमांकावर आला आहे. फलंदाजांच्या क्रमवारीत फक्त रोहित शर्मा अव्वल 10 मध्ये आहे, तर तीन भारतीय खेळाडू गोलंदाजांमध्ये पहिल्या 10 मध्ये स्थान मिळवण्यात यशस्वी झाले आहेत. जसप्रीत बुमराह 764 रेटिंगसह 10 व्या स्थानावर आहे.