T20 World Cup 2022 India vs Pakistan : भारत वि. पाकिस्तान सामना जसजसा जवळ येत चालला आहे, तशी मेलबर्न शहरातील वर्दळ वाढू लागली आहे... २०१५ मध्ये भारत वि. पाकिस्तान सामना अॅडलेडला खेळवला गेला होता. ज्याची प्रेक्षक क्षमता मेलबर्न क्रिकेट मैदानाच्या एक तृतियांश आहे. सामन्याचा आनंद मैदानात घेणारे जेव्हढे प्रेक्षक होते, तेवढेच क्रिकेटप्रेमी अॅडलेडला केवळ वातावरणाचा अनुभव घ्यायला आले होते. साहजिकच अॅडलेड शहराची हे सगळे हाताळताना तारांबळ उडाली होती.

अॅडलेडच्या सर्व हॉटेल, रेस्टॉरंटस्, खाण्याच्या छोट्या-मोठ्या स्टॉलवरचे अन्न अगदी संपून गेले होते. मेलबर्न त्या मानाने खूप मोठे शहर आहे. स्टेडियमही मोठे आहे; तरीही भारत-पाकिस्तान सामन्याच्या अगोदर आणि सामन्याच्या वेळी रविवारी काय होणार, याची उत्सुकता सगळ्यांना आहे. दुर्दैवाने मेलबर्न शहरातील हवामान बदलले असल्याने चर्चा पावसाची आहे.

शुक्रवारी चांगल्या हवामानाचा फायदा घेऊन काही भारतीय खेळाडूंनी मेलबर्न क्रिकेट मैदानाच्या सराव सुविधांचा वापर केला. कर्णधार रोहित शर्मा आणि दिनेश कार्तिकने बराच वेळ फलंदाजीचा सराव केला. अर्शदीप सिंग, मोहम्मद शमी, शार्दुल ठाकूर आणि मोहम्मद सिराजने फलंदाजांना जोरदार मारा केला. नंतर दीपक हुडा आणि अक्षर पटेल फलंदाजी करताना दिसले. प्रशिक्षक राहुल द्रविड सर्व सरावावर बारीक लक्ष ठेवताना दिसले. मेलबर्न क्रिकेट क्लबची सराव सुविधा मुख्य स्टेडियम बाहेरील मोकळ्या जागेत असल्याने सराव बघायला दर्दी क्रिकेटरसिकांनी हजेरी लावली होती.