मुंबई : भारतीय कुमार संघाने दक्षिण आशियाई 18 वर्षांखालील फुटबॉल स्पर्धेतील धडाका कायम राखताना मालदीवचा 4-0 असा पराभव केला. काठमांडूतील ही लढत जिंकत भारताने अंतिम फेरी गाठण्याची औपचारिकता सहज पूर्ण केली.

नरेंदर गहलोत, मानवीर सिंग, निंथोईनगांना मीताई यांनी प्रत्येकी एक गोल करीत भारताचा विजय सुकर केला, तर पूर्वार्ध संपण्याच्या सुमारास आहनाफ राशीद याच्याकडून स्वयंगोल झाल्यामुळे भारताकडे विश्रांतीस 2-0 आघाडी होती.

सातव्या मिनिटास भारताने आघाडी घेतल्याने मालदीव हादरले, पण त्यातून सावरल्यावर त्यांनी चांगली प्रतिआक्रमणे केली होती. अर्थात त्यानंतरही भारतीयांनी दोन्ही बगलातून चाली करीत मालदीववरील दडपण कधीही कमी होऊ दिले नाही. आता स्पर्धेतील अंतिम फेरीत भारताची लढत पारंपरिक प्रतिस्पर्धी बांगलादेशविरुद्ध रविवारी होईल.

पूर्वार्धातील दोन गोलच्या आघाडीमुळे भारताने उत्तरार्धात बचाव जास्त भक्कम केला. अर्थात त्यानंतरही मधल्या फळीच्या साथीत भारतीय आक्रमकांकडेच सूत्रे होती. उत्तरार्धाच्या मध्यास भारतीय खेळात काहीसे शैथिल्य आले होते, त्याचा फायदा घेत मालदीवने चांगली आक्रमणे रचली. भारतीय बचावाचा कस लागला. त्यामुळे खडबडून जागे झालेल्या भारतीयांनी आक्रमणाचा धडाका सुरू करीत चौथा गोल करीत मालदीवच्या प्रतिकाराच्या आशाच संपवल्या.