IPL 2023 RCB vs DC Live Score : रॉयल चॅलेंजर बेंगलोर आणि दिल्ली कॅपिट्लस यांच्यातील सामन्यात आज नाणेफेक जिंकून दिल्लीने प्रथम गोलंदाजी करण्याचा निर्णय घेतला. चांगली सुरूवात करूनही दिल्लीच्या भेदक माऱ्यासमोर मधली फळी ढेपाळल्यामुळे आरसीबीला 20 षटकात 6 बाद 174 धावांपर्यंतच मजल मारता आली. आरसीबीकडून विराट कोहलीने सर्वाधिक 50 धावा केल्या. दिल्लीकडून मिचेल मार्श आणि कुलदीप यादवने प्रत्येकी 2 विकेट घेतल्या.

आरसीबीची स्टार सलामी जोडी फाफ ड्युप्लेसिस आणि विराट कोहली यांनी 5 व्या षटकात संघाला 40 धावांच्या पार पोहचवले. मात्र 22 धावांवर ड्युप्लेसिसला बाद करत मिचेल मार्शने ही जोडी फोडली. त्यानंतर विराट कोहली आणि महिपाल लोमरोरने भागीदारी रचण्याच प्रयत्न केला.

विराट कोहलीने 34 चेंडूत अर्धशतकी खेळी करत आरसीबीला 100 च्या जवळ पोहचवले. मात्र ललित यादवने त्याचा अडसर दूर करत दिल्लीला दिलासा दिला. यानंतर दिल्लीच्या मिचेल मार्श, अक्षर पटेल आणि कुलदीप यादव यांनी भेदक मारा करत आरसीबीची मधील फळी फेल केली.

महिपाल 26 तर मॅक्सवेल 24 धावा करून बाद झाला. तर दिनेश कार्तिकला भोपळाही फोडता आला नाही. आरसीबीची अवस्था 3 बाद 132 वरून 6 बाद 132 धावा अशी झाली. कुलदीप यादवने 23 धावात 2 बळी टिपले. त्याला मिचेल मार्शने 2 षटकात 2 विकेट घेत चांगली साथ दिली.

यानंतर अनुज रावत आणि शाहबाज अहमदने 42 धावांची भागीदारी रचस संघाला 174 धावांपर्यंत मजल मारून दिली.