Deodhar Trophy : दक्षिण विभागाने गुरुवारी देवधर क्रिकेट करंडकाच्या अजिंक्यपदावर मोहोर उमटवली. रोहन कुन्नूम्मल याचे धडाकेबाज शतक, कर्णधार मयांक अगरवाल व नारायण जगदीशन यांची दमदार अर्धशतके आणि सर्व गोलंदाजांनी केलेल्या प्रभावी कामगिरीच्या जोरावर दक्षिण विभागाने अंतिम फेरीच्या लढतीत पूर्व विभागावर ४५ धावांनी मात केली आणि झळाळता करंडक पटकावला.

दक्षिण विभागाकडून पूर्व विभागासमोर ३२९ धावांचे आव्हान ठेवण्यात आले होते. वासुकी कौशिक व विदवाथ कावेरप्पा यांनी छान गोलंदाजी केल्यामुळे पूर्व विभागाची ३ बाद १४ धावा अशी अवस्था झाली. त्यानंतर सुदीप घरामीने ४१ धावांची, सौरभ तिवारीने २८ धावांची खेळी केली.

रियान पराग व कुमार कुशाग्र या जोडीने पूर्व विभागाच्या विजयाच्या आशा कायम ठेवल्या. रियानने ६५ चेंडूंमध्ये ८ चौकार व ५ षटकारांसह ९५ धावांची खेळी साकारली. कुशाग्रने ५८ चेंडूंमध्ये ६८ धावांची खेळी केली. पण अष्टपैलू खेळाडू वॉशिंग्टन सुंदर याने या दोन्ही फलंदाजांना निर्णायक क्षणी बाद करीत दक्षिण विभागासाठी मौल्यवान कामगिरी केली. पूर्व विभागाचा डाव २८३ धावांवर आटोपला.

धडाकेबाज सलामी भागीदारी

दरम्यान, याआधी दक्षिण विभागाने नाणेफेक जिंकून प्रथम फलंदाजी करण्याचा निर्णय घेतला. रोहन कुन्नूम्मल व कर्णधार मयांक अगरवार या सलामी जोडीने १८१ धावांची शानदार भागीदारी करीत संघ व्यवस्थापनाचा प्रथम फलंदाजी करण्याचा निर्णय सार्थ ठरवला. दोघांनी पूर्व विभागाच्या गोलंदाजांवर वर्चस्व गाजवले. रोहन याने ७५ चेंडूंमध्ये ११ चौकार व ४ षटकारांसह १०७ धावांची खेळी साकारली. मयांकने ६३ धावा फटकावल्या. उत्कर्ष सिंहने दोघांना बाद केले. त्यानंतर नारायण जगदीशनने ५४ धावांची आणि रोहित रायुडूने २६ धावांची खेळी केली. साई किशोर याने अखेरच्या षटकांत चमक दाखवत नाबाद २४ धावा केल्या. दक्षिण विभागाने ८ बाद ३२८ धावा फटकावल्या.