भारताचा माजी फलंदाज मोहम्मद कैफने (Mohammad Kaif) रोहित शर्माबद्दल (Rohit Sharma) सोशल मीडियावर एक पोस्ट केली आहे. यात त्याने जरी रोहितवर टीका केली नाही तर खेळाडूंना त्याच्याशी हस्तांदोलन करताना सांभळून राहण्याचा सल्ला दिला आहे. रोहित शर्माने जेव्हापासून भारतीय संघाचे नेतृत्व (Captaincy) हातात घेतले आहे तेव्हापासून भारताच्या विजयाचा सूर्य मावळतीकडे झुकलेलाच नाही. भारताने एकही टी 20 सामना गमावलेला नाही. रोहितच्या कॅप्टन्सीवर, संघ निवडीवर बदली खेळाडू तयार करण्याच्या रणनीतीवर माजी खेळाडू जाम खूष आहेत. रोहितने वेस्ट इंडीज पाठोपाठ आता श्रीलंकेविरूद्धची टी 20 मालिका देखील खिशात टाकली आहे.

दरम्यान, कॅप्टन रोहितच्या या कामगिरीवर जाम खूष असलेल्या मोहम्मद कैफनं एक ट्विट केलं. या ट्विटमध्ये कैफ म्हणतो की, 'रोहित शर्माशी संध्याच्या काळात हस्तांदोलन करताना जरा सांभाळून कारण तो ज्या कोणत्या गोष्टीला हात लावतोय त्याचं सोनं होत आहे. श्रेयसला नंबर तीन वर फलंदाजीला पाठवणं, खेळाडूंचे रोटेशन, गोलंदाजीतील बदल त्याचे प्रत्येक पाऊल मास्टर स्ट्रोक.'

श्रीलंकेविरूद्धच्या दुसऱ्या टी 20 सामन्यात रोहित शर्माने मोक्याच्या वेळी गोलंदाजीत चांगले बदल करून श्रीलंकेला 184 धावात रोखले. त्यानंतर फलंदाजी करताना त्याने बॅटिंग ऑर्डरमध्ये बदल करून हे आव्हान 18 षटकाच पार केले. दुसऱ्या टी 20 सामन्यात रोहितने श्रेयस अय्यरला (Shreyas Iyer) तिसऱ्या क्रमांकावर फलंदाजीला पाठवले. तर रविंद्र जडेजाला (Ravindra Jadeja) पाचव्या क्रमांकावर फलंदाजी करण्याच्या संधी दिली. अय्यरने 74 धावांची मॅच विनिंग खेळी केली. तर जडेजाने 18 चेंडूत 45 धावा ठोकून भारताचा विजय सोपा केला.