अफगाणिस्तानचा कर्णधार मोहम्मद नबीने टी-20 विश्वचषक 2022 च्या 38 व्या सामन्यानंतर कर्णधारपदाचा राजीनामा दिला आहे. त्याने ट्विटरवर एका पोस्टद्वारे संघाचे कर्णधारपद सोडण्याची घोषणा केली.T20 विश्वचषक 2022 च्या शेवटच्या सामन्यात अफगाणिस्तानला ऑस्ट्रेलियाकडून 4 धावांनी पराभव स्वीकारावा लागला. 8व्या टी-20 विश्वचषकात अफगाणिस्तानला एकही सामना जिंकता आला नाही.

मोहम्मद नबीने आपल्या पोस्टमध्ये लिहिले की, आमचा T20 वर्ल्ड कपचा प्रवास संपला आहे. आम्हाला मिळालेल्या निकालाची आम्हाला किंवा आमच्या समर्थकांनाही अपेक्षा नव्हती. सामन्यांच्या निकालाने तुम्ही जितके निराश आहात तितकेच आम्हीही निराश आहोत. गेल्या एक वर्षापासून आमच्या संघाची तयारी एखाद्या मोठ्या स्पर्धेसाठी कर्णधाराला हवी असेल किंवा आवश्यक असेल त्या पातळीवर नव्हती. तसेच गेल्या काही दौऱ्यांमध्ये संघ व्यवस्थापन, निवड समिती यांच्यात समन्वय नव्हता, त्यामुळे संघाच्या स्थिरतेवर परिणाम झाला. त्यामुळे योग्य त्या सन्मानाने मी कर्णधारपदावरून पायउतार होत असल्याची घोषणा करत आहे आणि जेव्हा व्यवस्थापन आणि संघाला माझी आवश्यकता असेल तेव्हा मी माझ्या देशासाठी खेळत राहीन. असे त्याने म्हटले आहे.

त्याने पुढे लिहिले की, मी तुमच्यापैकी प्रत्येकाचे मनापासून आभार मानतो जे पावसामुळे प्रभावित होऊनही मैदानात आले आणि ज्यांनी जगभरातून आम्हाला साथ दिली, तुमचे प्रेम आमच्यासाठी खूप महत्त्वाचे आहे. आफगाणिस्तान चिरायू राहो.

संघ एकही सामना जिंकू शकला नाही...

दरम्यान हा टी-20 विश्वचषक अफगाणिस्तानसाठी खूपच निराशाजनक होता .सुपर-12 मध्ये थेट क्वालिफाय झालेल्या या संघाचे दोन सामने पावसामुळे रद्द झाले, तर 3 सामन्यात या संघाला पराभवाला सामोरे जावे लागले. या विश्वचषकात अफगाणिस्तान हा एकमेव संघ आहे जो एकही सामना जिंकू शकला नाही.

ऑस्ट्रेलियाविरुद्धच्या सामन्याबद्दल बोलायचे तर, ऑस्ट्रेलिया फलंदाजी करताना निर्धारित 20 षटकांत 8 गडी गमावून 168 धावा केल्या होत्या.ऑस्ट्रेलियाकडून ग्लेन मॅक्सवेलने नाबाद 54 धावांचे अर्धशतक झळकावले.त्यांच्याशिवाय मिचेल मार्शने 45, वॉर्नर आणि स्टॉइनिसने प्रत्येकी 25 धावा केल्या. दुसरीकडे अफगाणिस्तानकडून नवीन-उल-हकने तीन बळी घेतले.

नेट रनरेटच्या बाबतीत इंग्लंडला पराभूत करण्यासाठी ऑस्ट्रेलियाला अफगाणिस्तानला 106 धावांआधीच रोखायचे होते, पण कांगारू संघाला त्यात अपयश आले.169 धावांच्या लक्ष्याचा पाठलाग करताना अफगाणिस्तानला 20 षटकांत 7 गडी गमावून 164 धावांपर्यंतच मजल मारता आली. शेवटी रशीद खानने 23 चेंडूत 3 चौकार आणि 4 षटकारांच्या मदतीने 48 धावांची तुफानी खेळी केली, मात्र तो संघाला विजय मिळवून देऊ शकला नाही.