New Zealand Vs Afghanistan : वर्ल्डकप 2023 मध्ये आज अफगाणिस्तान आणि न्यूझीलंड यांच्यात चेन्नईच्या चेपॉक स्टेडियममध्ये सामना रंगला. तगडी फिरकी असलेला अफगाणिस्तान इंग्लंडप्रमाणे न्यूझीलंडला देखील झटका देणार असा अंदाज होता. अफगाणिस्तानने न्यूझीलंडला सुरूवातीला तसे झटके दिलेही.

मात्र त्यांचा डाव कर्णधार टॉम लॅथम आणि ग्लेन फिलिप्स यांनी हाणून पाडला. या दोघांनी पाचव्या विकेटसाठी केलेल्या 144 धावांच्या दमदार भागीदारीमुळे न्यूझीलंडने 4 बाद 110 धावांवरून 6 बाद 288 धावांपर्यंत मजल मारली.

चेन्नईच्या टर्निंग ट्रॅकवर अफगाणिस्तानने नाणेफेक जिंकून प्रथम गोलंदाजी करण्याचा निर्णय घेतला. सीएसकेकडून खेळणारा सलामीवीर डेवॉन कॉनवेला मुजीबने 20 धावांवर बाद करत पहिला धक्का देखील दिला.

मात्र त्यानंतर विल यंग आणि रचिन रविंद्र यांनी दुसऱ्या विकेटसाठी 79 धावांची भागीदारी रचून संघाला 20 व्या षटकापर्यंत शतकी मजल मारून दिली. यात विल यंगच्या 54 धावांचा वाटा मोठा होता.

अखेर ही जोडी अजमतुल्लाने फोडली. त्याने रचिनचा 32 धावांवर त्रिफळा उडवला. त्यानंतर त्याच षटकात शेवटच्या चेंडूवर 54 धावा करणाऱ्या यंगला देखील बाद करत किवींचे दोन्ही सेट झालेले फलंदाज माघारी धाडले. यानंतर राशिद खानने पुढच्याच षटकात डॅरेल मिचेलला बाद करत न्यूझीलंडची अवस्था 1 बाद 109 धावांवरून 4 बाद 110 धावा अशी केली.

अवघ्या 1 धावेत न्यूझीलंडने तीन फलंदाज गमावल्यानंतर अफगाणिस्तान सामन्यावर पकड मजबूत करेल असे वाटले होते. मात्र कर्णधार टॉम लॅथम आणि ग्लेन फिलिप्स यांनी पाचव्या विकेटसाठी 144 धावांची खणखणीत भागीदारी रचली. अखेर नवीन उल हकने 48 व्या षटकात फिलिप्लला 71 तर लॅथमला 68 धावांवर बाद करत एकाच षटकात दोन धक्के दिले. अखेर मार्क चॅपमनने 12 चेंडूत 25 धावा करत न्यूझीलंडला 50 षटकात 6 बाद 288 धावांपर्यंत पोहचवले.

अफगाणिस्तानकडून अझमतुल्ला ओमरजाई आणि नवीन उल हक यांनी प्रत्येकी 2 विकेट्स घेतल्या. तर मुजीब उर रहमान आणि राशिद खान यांनी प्रत्येकी 1 विकेट घेतली.

(Sports Latest News)