India at Paris Paralympic 2024: पॅरिस पॅरालिम्पिक २०२४ स्पर्धेतील सुरुवात भारतासाठी शानदार ठरली आहे. त्यातही शुक्रवारी भारताच्या खात्यात मोठ्या प्रमाणात पदकांची भर पडली. भारतासाठी नेमबाज मनीष नरवाल याने रौप्य पदक जिंकले. हे भारताचे पॅरिस पॅरालिम्पिकमधील चौथे पदक ठरले.

मनीष नरवालने पुरुषांच्या १० मीटर एअर पिस्तुल SH1 प्रकारात हे रौप्य पदक जिंकले. नेमबाजीतील भारताचे हे आत्तापर्यंतचे यंदाच्या पॅरालिम्पिकमधील तिसरे पदक आहे.

मनीषने अंतिम फेरीत २३४.९ पाँइंट्स मिळवत रौप्य पदकावर हक्क सांगितला. त्याला कोरियाच्या जोंगडू जो याने मागे टाकत सुवर्ण पदक जिंकले. जो याने २३७.४ पाँइंट्स मिळवले. चीनच्या चाओ यांगने २१४.३ पाँइंट्स मिळवत कांस्य पदक जिंकले.

मनीषचे हे पॅरालिम्पिकमधील दुसरे पदक आहे. त्याने टोकियो पॅरालिम्पिकमध्ये मिश्र गटात ५० मीटर पिस्तुल SH1 प्रकारात सुवर्णपदक जिंकले होते.

अवनीला सुवर्णपदक

मनीषपूर्वी शुक्रवारी भारताला नेमबाजीतच अवनी लेखरा आणि मोना अगरवाल यांनी पदके मिळवून दिली. या दोघींनीही महिलांच्या १० मीटर एअर रायफल स्टॅन्डिंग SH1 प्रकारात ही शानदार कामगिरी केली.

अवनी लेखरा हिने सुवर्ण पदकाला गवसणी घातली, तर मोना अगरवाल हिने कांस्य पदक जिंकले. दरम्यान, अवनीचे हे पॅरालिम्पिकमधील दुसरे सुवर्णपदक ठरले. तिने टोकियो पॅरालिम्पिकमध्येही सुवर्णपदक जिंकले होते. त्यामुळे अशी कामगिरी करणारी ती पहिली भारतीय महिला ठरली आहे.

प्रीतीला कांस्य पदक

भारताच्या खात्यातील तिसरे पदक प्रीती पाल हिने मिळवून दिले. तिने महिलांच्या T35 १०० मीटर प्रकारात कांस्य पदक जिंकले. तिने तिची सर्वोत्तम कामगिरी करताना हे पदक जिंकले. पॅरालिम्पिकमधील ऍथलेटिक्सच्या ट्रॅक प्रकारातील हे भारताचे पहिलेच पदक ठरले आहे.