कऱ्हाड (सातारा) : ऑलिम्पिकवीर खाशाबा जाधव यांना मरणोत्तर पद्म विभूषण मिळावा, खाशाबा जाधव यांच्या नावाने होत असलेल्या राष्ट्रीय कुस्ती संकुलास निधी उपलब्ध व्हावा, खाशाबांचे नाव वापरुन बोगस पुरस्कार देणाऱ्यांवर कारवाई करावी यासह अन्य मागण्यांसाठी आज त्यांचे पुत्र रणजीत जाधव व कुस्ती मल्लविद्या महासंघाच्या वतीने आज येथे लाक्षणिक आंदोलन करण्यात आले.

कऱ्हाड शहरातील कार्वे नाक्यावरील खाशाबा जाधव यांच्या स्मृतीस्तंभास अभिवादन करुन आंदोलनास प्रारंभ करण्यात आला. यावेळी स्मृतीस्तंभासमोर लाक्षणिक आंदोलन करण्यात आले. यावेळी बोलताना श्री. जाधव म्हणाले, ज्या सुपुत्राने भारताचे नाव ७० वर्षांपूर्वी जगाच्या नकाशावर कोरले त्यांना अजूनही मरणोत्तर पद्म पुरस्कार जाहीर झालेला नाही. राज्य शासनाने केंद्र डावलणार नाही असे नाव पाठवावे. शासनाने खाशाबा जाधव यांच्या जन्मभूमीत कुस्ती संकुल उभे करण्याची घोषणा केलीय. त्यासाठी पाच कोटी रुपये मंजूर झाले आहेत. मात्र, १० वर्षे कंपाऊंडचेच काम सुरु आहे.

शासनाने एका वर्षाच्या आत कुस्ती संकुल पूर्ण करावे, हीच त्यांना आदरांजली ठरेल. नीरज चोप्राने आपल्या देशाचे नाव जगात गाजवले. त्याच्या या कामगिरीवर केंद्रीय मंत्री राजनाथ सिंह यांनी आर्मीच्या क्रीडांगणाला १५ दिवसात त्याचे नाव दिले आहे. मग, खाशाबा जाधव यांच्यावर असा अन्याय का होत आहे? खाशाबा जाधव यांच्या नावाने होणाऱ्या स्पर्धा चार वर्षापासून बंद आहेत. त्या पूर्ववत सुरु कराव्यात. कुस्त्यांची मैदाने कोरोनामुळे बंद केली आहेत. ती पूर्ववत सुरु करावी. त्याचबरोबर खाशाबांच्या नावाने काहीजणांनी बोगस पुरस्कार दिले, त्यातून पैसे गोळा केले त्यांच्यावर कायदेशीर कारवाई करावी. या सर्व प्रश्नासंदर्भात येत्या पंधरा दिवसांत निर्णय घ्यावा, अन्यथा त्यांच्या नावाच्या स्मृतीस्तंभासमोर आमरण उपोषणास बसणार आहोत, असा इशाराही त्यांनी दिला.