ऑस्ट्रेलियाच्या कसोटी संघाचा उपकर्णधार स्टीव्ह स्मिथ (Steve Smith) लाहोर येथे सुरू असलेल्या पाकिस्तान विरूद्धच्या (Pakistan vs Australia) तिसऱ्या कसोटी सामन्याच्या पहिल्या दिवशीच जाम भडला. आधीच पाकिस्तानने ऑस्ट्रेलियाची अवस्था 2 बाद 8 अशी केली होती. त्यानंतर स्टीव्ह स्मिथ आणि उस्मान ख्वाजा यांनी कांगारूंचा डाव कसाबसा सावरला होता. स्टीव्ह स्मिथ डोळ्यात तेल घालून फलंदाजी करत होता.

मात्र मैदानावरील बग्गी कॅमेरा (Buggy Camera) बरोबर स्मिथ फलंदाजी करत असतानाचा हालचाल करत होता. यावर स्टीव्ह स्मिथ जाम भडकला (Steve Smith Angry). त्याने चेंडू खेळल्या खेळल्या लेग अंपायरकडे याबाबत तक्रार केली. विशेष म्हणजे हा कॅमेरा गोलंदाजाच्या मागे नाही तर डीप मिडविकेटला होता. तरी या कॅमेऱ्याच्या हालचालीने स्टीव्ह स्मिथचे लक्ष विचलित होत होते. स्टीव्ह स्मिथ हा आपल्या चांगल्या आय साईडसाठी ओळखला जातो. त्याने याच जिवावर आतापर्यंत धावांचा पाऊस पाडला आहे.

पाकिस्तान विरूद्धच्या कसोटी मालिकेत स्टीव्ह स्मिथने आतापर्यंत चांगली फलंदाजी केली आहे. त्याने दोन डावात 78 आणि 72 अशा धावा केल्या आहेत. मात्र स्मिथला आपल्या या खेळी शतकात रूपांतरित करता आल्या नाहीत. आजच्या सामन्यातही त्याने ऑस्ट्रेलियाचा डाव सावरला आणि उस्मान ख्वाजाबरोबर तिसऱ्या विकेटसाठी 138 धावांची भागीदारी रचली. मात्र त्याला आपल्या 59 धावांच्या खेळीचे शतकात रूपांतर करता आले नाही.