पॅरिस : पॅरिस ऑलिंपिकमधील टेनिस या खेळाच्या स्पर्धेमध्ये जगभरातील दिग्गज खेळाडूंचा सहभाग असणार आहे. याच पार्श्वभूमीवर टेनिसप्रेमींना अव्वल दर्जाचा खेळ याप्रसंगी पाहायला मिळण्याची दाट शक्यता आहे. अव्वल मानांकित नोवाक जोकोविच व माजी ऑलिंपिक सुवर्णपदक विजेता राफेल नदाल हे दोन महान खेळाडू दुसऱ्या फेरीतच एकमेकांसमोर येण्याची दाट शक्यता आहे.

नोवाक जोकोविच याने अद्याप ऑलिंपिकमध्ये सुवर्णपदक पटकावलेले नाही. सलामीच्या लढतीत तो ऑस्ट्रेलियाच्या मॅथ्यू एब्डेन याचा सामना करील. तसेच, २००८ बीजिंग ऑलिंपिकमध्ये सुवर्णपदक जिंकलेल्या राफेल नदालला हंगेरीच्या मार्टोन फुकसोविक्स याच्याशी दोन हात करावे लागणार आहेत.

रोलँड गॅरो येथील लाल मातीवर या लढती होणार आहेत. २७ जुलै ते ४ ऑगस्ट यादरम्यान टेनिस या खेळाची स्पर्धा रंगेल. येथेच राफेल नदालने १४वेळा फ्रेंच ओपन ग्रँडस्लॅमचे अजिंक्यपद पटकावले हे विशेष.

अशा उपांत्यपूर्व फेरीच्या लढती रंगण्याची शक्यता

• नोवाक जोकोविच - स्टेफानोस त्सिस्तिपास

• ॲलेक्झँडर झ्वेरेव - टेलर फ्रिट्‌झ

• डॅनिल मेदवेदेव - कॅस्पर रुड

• कार्लोस अल्काराझ - ॲलेक्स दी मिनॉर