मुंबई : उन्मुक्त चंद हे नाव सर्वांच्या लक्षात असेलच. कारण, उन्मुक्तने भारताला २०१२ मध्ये १९ वर्षांखालील विश्वचषक जिंकून दिले होते. त्यावेळी तो प्रतिभावान खेळाडू असल्याचे बोलले जात होते. तो भारतासाठी आंतरराष्ट्रीय सामने खेळेल अशी सर्वांना आशा होती. मात्र, तसे काही झाले नाही. उलट ऑगस्टमध्ये त्याने निवृत्ती जाहीर केली होती.

उन्मुक्त चंदच्या क्रिकेट कारकिर्दीची सुरुवात अगदी दणक्यात झाली. परंतु, तितक्याच वेगाने तो मागेही आला. भारताला १९ वर्षांखालील विश्वचषक जिंकून दिल्यानंतरही त्याला भारताकडून आंतरराष्ट्रीय सामने खेळण्याची संधी मिळाली नाही. यामुळेच त्याने भारतीय क्रिकेटमधून निवृत्ती जाहीर केली होती. त्याच्या या निर्णयाने अनेकांच्या भुवया उंचावल्या होत्या. मात्र, तो आता ऑस्ट्रेलियाकडून क्रिकेट खेळताना दिसणार आहे.

उन्मुक्तने अमेरिकन लीगमध्ये चमकदार कामगिरी केली आहे. त्याच्या या कामगिरीचे चांगले फळ मिळाले आहे. त्याला आता ऑस्ट्रेलियाच्या बिग बॅश लीगमध्ये खेळण्याची संधी मिळाली आहे. तो ॲरोन फिंचच्या मेलबर्न रेनेगेडस संघातून खेळताना दिसणार आहे. याची माहिती फ्रेंचाइजीने ट्विटर अकाऊंटवर दिली आहे.

उन्मुक्त चंदची तुलना भारताचा कर्णधार विराट कोहलीसोबत केली जात होती. परंतु, विश्वचषक मिळवून देण्यापलीकडे तो भारतासाठी काही खास कामगिरी करू शकला नाही. त्याने आयपीएलमध्येही करिअर घडविण्याचा प्रयत्न केला. मात्र, यातही त्याला यश आले नाही. उन्मुक्त चंदने दिल्ली, मुंबई आणि राजस्थान या तीन संघातून खेळला होता. अमेरिकेत स्थायिक झाल्यानंतर उन्मुक्त चंद बिग बॅश लीगमध्ये खेळणारा पहिला भारतीय पुरुष क्रिकेटर ठरला आहे. मेलबर्न संघाचे प्रतिनिधित्व करण्याची संधी मिळाल्याचा अभिमान असल्याचे उन्मुक्त चंदने म्हटले आहे.