बुडापेस्ट : बुडापेस्ट रँकिंग कुस्ती स्पर्धेत ५७ किलो गटात भारताची अनुभवी मल्ल अंशू मलिक चीनच्या २१ वर्षीय केझिन हाँग हिच्याकडून एकतर्फी पराभूत झाली. परिणामी तिला रौप्यपदकावर समाधान मानावे लागले.

चीनची केझिन हाँगी ही अव्वल नंबरी कुस्तीपटू आहे. हाँगचौऊ येथे झालेल्या आशियायी क्रीडा स्पर्धेत तिने ब्राँझ पदके जिंकलेले आहे. आजच्या अंतिम सामन्यात मात्र अंशू तिला आव्हान देऊ शकली नाही. १-१२ अशा फरकाने अंशूचा पराभव झाला.

महिलांच्या ५३ किलो गटात अंतिम पंघाल हिलाही रौप्यपदकावर समाधान मानावे लागले; तर ५० किलो गटात विनेश फोगाटचा चीनच्या जियांग झाऊ हिच्याकडून उपांत्यपूर्व फेरीत ०-५ असा पराभव झाला.

अंशूने त्याअगोदर अनास्तासिया निचिता हिचा ६-५ असा पराभव करून उपांत्य फेरी गाठली होती. त्यानंतर जागतिक विजेत्या झँग क्यूई हिच्यावर २-१ अशी मात करून अंतिम फेरी गाठली होती. त्यामुळे सुवर्णपदक जिंकण्याच्या आशा तिने उंचावल्या होत्या.