खाईस्टचर्च, ता. १० : साडेतीनशे धावांपर्यंत मारलेली मजल आणि त्यानंतर दीडशे धावांपर्यंत न्यूझीलंडचा बाद केलेला निम्मा संघ अशी कामगिरी करणाऱ्या श्रीलंकेने या पहिल्या कसोटी सामन्यात वर्चस्व मिळवून भारतावरचे दडपण वाढवले आहे.

येथे अहमदाबादमध्ये ऑस्ट्रेलियाने भारताविरुद्धच्या कसोटी सामन्यात धावांचा डोंगर उभा केला आहे; तर ख्राइस्टचर्चमध्ये श्रीलंका कमाल करत आहे. कसोटी अजिंक्यपदाच्या अंतिम सामन्यातील दुसरा संघ भारत आणि श्रीलंका यातून निश्चित होणार आहे.

भारताला अहमदाबाद कसोटी जिंकावी लागणार आहे. तसे झाले नाही, तर श्रीलंका न्यूझीलंडविरुद्धच्या दोनपैकी एका कसोटीत पराभूत होणे भारतासाठी मार्ग मोकळा करणारे ठरणार आहे; परंतु श्रीलंकेने पहिल्या कसोटीत शानदार सुरुवात केली आहे.

न्यूझीलंडच्या थंड हवामानात आणि वेगवान गोलंदाजांना पूरक अशा वातावरणात उपखंडातील खेळाडूंना फलंदाजी करणे कठीण जाते, असे म्हटले जाते; परंतु श्रीलंकेने पहिल्या डावात ३५५ धावांपर्यंत मजल मारली. त्यानंतर दुसऱ्या दिवसअखेर न्यूझीलंडची ५ बाद १६२ अशी अवस्था केली. न्यूझीलंडचा संघ अजूनही १९३ धावांनी पाठीमागे आहे.