Gudi Padwa 2024 : साडेतीन मुहूर्तांपैकी एक असलेल्या गुढीपाडवा सणानिमित्त शहरातील बाजारपेठा सज्ज झाल्या आहेत. चिव्याची काठी, साखरेच्या माळा, फळे, चाफ्यांच्या फुलांची माळ, कलश, मिनी गुढीसह अन्य वस्तूंनी बाजारपेठ सजली आहे.

अवघ्या दोन दिवसांवर गुढीपाडवा आल्याने बाजारपेठेत नवीन वस्तू खरेदीसाठी उधाण आले आहे. पाडव्‍यानिमित्त वस्तू खरेदीसाठी गेल्या काही दिवसांपासून ग्राहक चौकशीसाठी शोरूममध्ये येत आहेत. गुढीसाठी शहरातील बिंदू चौक, दसरा चौक, मिरजकर तिकटी व टिंबर मार्केट या ठिकाणी चिव्यांचे ढीग लागले आहेत. ८० ते १५० रुपयांप्रमाणे या चिव्यांची विक्री होत आहे.

अमावास्येआधी गुढीची काठी नेण्याची प्रथा असल्याने चिव्याची काठी व इतर साहित्य नेण्याकडे अनेकांचा कल आहे. शहरातील ठिकठिकाणी साखरेच्या माळांची विक्रीही होत आहे. एका माळेची किंमत २० ते ५० रुपये आहे. गुढीसाठी खास नव्या साड्याही साड्यांच्या दुकानात लक्ष वेधून घेत आहेत.

गुढीची साडी रेडिमेड

गुढी उभा करताना साडी, भरजरी ब्लाऊज पीसचा वापर करतात. गुढीला साडी नेसवताना महिलांना बराच वेळ खर्च करावा लागतो. त्यांची ही अडचण दूर करत विक्रेत्यांनी गुढीची तयार साडी बाजारात आणली आहे. गुढीला शोभणारी ही डिझायनर साडी पैठणी, भरजरी काठाची आणि सुंदर नक्षीकामात बनवली आहे. त्यामुळे यालाही महिला वर्गाची मोठी पसंती मिळते आहे.

मिनी गुढी तीनशे रुपयांपर्यंत

नववर्षाचे स्वागत मोठ्या उत्साहाने करण्यासाठी अपार्टमेंटमध्ये राहणाऱ्यांनी मिनी गुढी खरेदीला पसंती दिली आहे. गेल्या काही वर्षांपासून मिनी गुढीची मागणी वाढत आहे. ही गुढी साधारण दीडशे ते तीनशे रुपयांपर्यंत बाजारात उपलब्ध आहे.