इस्लामपूर: गृहिणीपासून नोकरी, व्यवसाय करणाऱ्या महिलांसाठी मोबाईल महत्त्वाचे डिव्हाईस ठरले आहे. परंतु, हाच मोबाईल वापरताना आपण योग्य काळजी व खबरदारी घेतली नाहीतर महिलांना कठीण प्रसंगाला सामोरे जावे लागू शकते. स्मार्ट फोन म्हणजे मोबाईल ही चैनीचे नव्हे; तर गरजेचे गॅझेट झाले आहे. मोबाईल म्हणजे संगणकाचे प्रतिरूपच आहे.

महिलांसाठी माहितीची देवाण-घेवाण, सोशल मीडियाचा वापर यापासून ते ई-मेल आयडीसाठी मोबाईल महत्त्वाचे माध्यम ठरले आहे. याचा वापर करताना योग्य ती काळजी, खबरदारी घेणे गरजेचे आहे, अन्यथा कठीण प्रसंग उभा राहू शकतो. याचबरोबर आर्थिक नुकसानही होऊ शकते.

ही घ्या काळजी

वैयक्तिक माहिती : आपले नाव, जन्मतारीख, लिंग, राहण्याचे ठिकाण, शाळेचे नाव, ई-मेल आयडी, कामाचे ठिकाण आणि स्वतःचा फोटो यासारखी वैयक्तिक माहिती कोणाला द्यावी याबाबत जागरूकता हवी.

सोशल मीडियावर फोटो टाकताना : फोटो कोण बघू शकतील याबाबत जागरूक रहा. सोशल मीडियावरील गोपनीयता सजगतेने जपली पाहिजे. तुम्हाला हव्या असलेल्या ठरावीक लोकांनाच ती माहिती दिसेल हे खात्रीपूर्वक पहावे. ज्या मांडळीशी संपर्क नसावा असे वाटते त्यांना ब्लॉक करावे.

व्हॉटस् ॲपवर राहा सावधान : व्हॉटस् ॲप किंवा इतर मेसेजिंग ॲपमधून मीडिया ऑटो डाऊनलोड काढून टाकावे. तुमच्याशी अपरिचित व्यक्तीच्या संदर्भात तर हे टाळावेच.

पासवर्ड वेगवेगळे ठेवा : वेगवेगळ्या अकाउंटसाठी वेगवेगळे पासवर्ड ठेवावेत. वेळोवेळी तुमचे इंटरनेटवरील कॉन्टॅक्स तपासत राहावे.

कोणाच्या तरी ओळखीचा मित्र-मैत्रीण म्हणून अनोळखी व्यक्तीची फ्रेंड रिक्वेस्ट स्वीकारू नका. कोणत्याही फसव्या अामिषाला बळी पडून व्यक्तिगत माहिती देऊ नका. पासवर्ड किंवा ओटीपीसारखी गोपनीय माहिती शेअर करू नका. मोबाईल नंबर, ई- मेल आयडी आदी माहिती सोशल नेटवर्किंग साईटवर टाकू नका. आवश्यक असेल तरच मोबाईलचा वापर करा.

- नीलम जाधव, पोलिस उपनिरीक्षक, इस्लामपूर पोलिस ठाणे