Raksha Bandhan Special Recipe: हल्ली बाजारात हवे तितके गोड पदार्थ मिळतात. त्यापेक्षा आपण घरीच गोड पदार्थांचा बेत केला तर. राखीपौर्णिमेला आपल्या लाडक्या भावासाठी आपणच काही बनवले तर. हा दिवस नारळी पौर्णिमा म्हणूनही साजरा होतो. त्यामुळे या दिवशी शक्यतो नारळाचे पदार्थ किंवा तांदळाची खीर बनवण्याची पद्धत आहे. जवळपास सर्व समाजात थोड्याफार फरकाने हे पदार्थ बनवले जातात. राखीपौर्णिमेच्या या निवडक रेसिपी खास तुमच्यासाठी.

नारळाची खीर

साहित्य

ओल्या नारळाचे दुध, तांदूळ, तूप, साखर, सुकामेवा, वेलची पूड.

कृती

अर्धी वाटी तांदूळ आदल्या रात्री भिजत घाला. दुस-या दिवशी पाणी उपसून थोड्या तुपावर परतून घ्या. नंतर मिक्सरमधसून रवाळ मिश्रण काढा. (हीच कृती तांदूळ परतूनही मग भिजत घालायचे अशीही करु शकता.) ओले नारळ खोवून घ्या. एका खोल पातेल्यावर मलमलचा कपडा धरा. या कपड्यात खोवलेल्या नारळाचा कीस टाका व कापड गुंडाळून चांगले पिळा. दुध भांड्यात पडेल व कापडात नारळाचा चव राहील. आता गॅसवर कढई तापत ठेवा. पाणी घालून उकळी येऊ द्या. यामध्ये तांदूळाचे मिश्रण टाका. गाठोळ्या न व्हाव्यात म्हणून सारखे ढवळत रहा. यामध्ये साखर व नारळाचे दूध टाका. मग वेलची पूड व सुकामेवा घाला. गरज भासल्यास नारळाचा चव घाला. नारळाची खीर तयार.

नारळी भात

साहित्य

तांदूळ १ वाटी, २- ३ लवंग, साखर १ वाटी, नारळाचा चव १ वाटी, दालचिनीचा तुकडा, केशर, तूप, काजू, किसमिस

कृती

भात मोकळा शिजवून घ्या. साखरेचा पक्‍का पाक करून घ्या व पाकातच केशर घाला. आता तुपाची फोडणी करा व त्यात लवंग, दा‌लचिनी, नारळाचा चव व भात घाला. नंतर काजू, किसमिस व साखरेचा पाक घालून मिश्रण हलक्‍या हाताने फिरवा. नारळी भात तयार.

ओल्या नारळाच्या करंज्या

साहित्य

ओले नारळ १, साखर १ वाटी, रवा २ वाटी, मैदा पाव वाटी, दूध, वेलची पूड, जायफळ पूड दोन्ही मिळून अर्धा चमचा, केशर गरजेनुसार, सुकामेवा

कृती

नारळ खोवून घ्या. कीस थोडा पिळून त्यात साखर, केशर, बारीक केलेला सुकामेवा, वेलची व जायफळ पावडर घालून सारण तयार करा. रवा व मैदा एकत्र करा व तुपाचे मोहन घालून दुधाने गोळा मळून घ्या. चांगला अर्धा-पाऊण तास गोळा ‌तसाच झाकून ठेवा. आता रव्या-मैद्याच्या पारीमध्ये सारण भरून करंज्या तयार करा. तुपात खमंग तळून घ्या. सर्व्ह करताना करंजीवर दुधात भिजवलेले केशर घाला.