South India Travel : सध्या देशातील अनेक राज्यांमध्ये उकाडा प्रचंड वाढला आहे. विशेष म्हणजे भारतातील वेगवेगळ्या ठिकाणी उन्हाळ्यात वेगवेगळे हवामान असते. काही ठिकाणी तापमान दमट असते तर काही ठिकाणी तापमान कमी असते. त्यामुळे, अशा परिस्थितीमध्ये जर तुम्ही फिरायला जाण्याचा विचार करत असाल तर ज्या ठिकाणी तुम्ही फिरायला जाणार आहात तेथील तापमानाची माहिती आधीच गोळा करा.

खरे तर उन्हाळ्याच्या दिवसांमध्ये लोकांना थंड हवेच्या ठिकाणी फिरायला जायला आवडते. यासाठी तुम्ही दक्षिण भारताची निवड करू शकता. कारण, दक्षिण भारतामध्ये अशी अनेक ठिकाणे आहेत जिथे तुम्ही थंड वातावरणात फिरण्याचा मनसोक्त आनंद घेऊ शकाल. मे आणि जून महिन्यात फिरायला जाण्यासाठी ही ठिकाणे बेस्ट ऑप्शन आहेत. कोणती आहेत ही ठिकाणे? चला तर मग जाणून घेऊयात.

मुन्नार

मे आणि जूनमध्ये भेट देण्यासाठी मुन्नार हे ठिकाण बेस्ट आहे. केरळ राज्यामध्ये मुन्नार हे ठिकाण स्थित आहे. हे लोकप्रिय पर्यटनस्थळ असून मे आणि जूनमध्ये येथील वातावरण थंड असते. येथील मोकळ्या नद्या, नयनरम्य टेकड्या आणि सुंदर चहाच्या बागा असलेले मुन्नार स्वर्गापेक्षा काही कमी नाही. विशेष म्हणजे दक्षिण भारतातील सर्वात उंच शिखर अनामुदी शिखर मुन्नारमध्ये आहे.

कुन्नूर

दक्षिण भारतातील हे आणखी एक लोकप्रिय पर्यटनस्थळ आहे. निलगिरी पर्वतांमध्ये वसलेले हे ठिकाण हिरवळीने नटले आहे. या दिवसांमध्ये कुन्नूरचे हवामान आल्हाददायक असते. तुम्ही या परिसरातल्या प्रेक्षणीय स्थळांना भेट देऊ शकता. त्यासोबत तुम्ही येथे ट्रेकिंगचा ही आनंद घेऊ शकता. येथील नयनरम्य निसर्गाच्या तुम्ही प्रेमात पडाल यात काही शंका नाही.

ऊटी

तामिळनाडू राज्यातील हे सर्वोत्तम पर्यटनस्थळ आहे, असे म्हटले तर ते चुकीचे ठरणार नाही. उन्हाळ्यात फिरण्यासाठी हे उत्तम ठिकाण आहे. हे ठिकाण देखील निलगिरी पर्वतरांगेमध्ये वसले असून येथील दऱ्याखोऱ्या, उंच टेकड्या, चहाच्या बागा आणि झरे आहेत. येथील आल्हाददायक वातावरणामध्ये तुम्ही निवांत वेळ घालवू शकाल.