नवी दिल्ली : कलकत्ता उच्च न्यायालयाचे माजी न्यायाधीश आणि भाजपचे पश्चिम बंगालमधील तुमलूक लोकसभा मतदारसंघाचे उमेदवार अभिजित गंगोपाध्याय यांना प्रचार करण्यासाठी एक दिवसाची मनाई करण्यात आली आहे.

काही दिवसांपूर्वी अभिजित गंगोपाध्याय यांनी मुख्यमंत्री ममता बॅनर्जी यांच्याबद्दल अपमानास्पद आणि असभ्य वक्तव्य केले होते. त्याप्रकरणी ही बंदी घालण्यात आली आहे.

‘‘या वक्तव्याने अभिजित गंगोपाध्याय यांनी पश्चिम बंगालची प्रतिष्ठा धुळीस मिळवली असून हे वक्तव्य खालच्या स्तराचे आणि व्यक्तीगत आहे,’’ असे मत केंद्रीय निवडणूक आयोगाने व्यक्त केले आहे.

अभिजित गंगोपाध्याय यांनी १५ मे रोजी एका प्रचार सभेत ममता यांच्याबद्दल असभ्य वक्तव्य केले होते. यावरून आदर्श आचार संहिता भंग केल्याची नोटीस केंद्रीय निवडणूक आयोगाने बजावल्यानंतर गंगोपाध्याय यांनी दिलेल्या उत्तराने निवडणूक आयोगाचे समाधान झाले नाही.