कोल्हापूर : ‘कोल्हापुरात काँग्रेसकडून (Congress) श्रीमंत शाहू छत्रपती महाराज (Shahu Chhatrapati Maharaj) उमेदवार असले तरी आम्ही महायुतीसोबतच असून, महायुतीच्या उमेदवाराच्या विजयासाठी आम्ही प्रयत्न करणार असल्याचे पालकमंत्री हसन मुश्रीफ (Hasan Mushrif) यांनी पत्रकारांशी बोलताना सांगितले.

दरम्यान, ‘गेल्या दोन-तीन निवडणुकांत खासदार सुप्रिया सुळेंची (Supriya Sule) मते कमी झालेली आहेत. त्यांना निवडून आणण्यासाठी अजित पवार यांनी जिवाचे रान यापूर्वी केलेले आहे. या निवडणुकीत सहा विधानसभा मतदारसंघांचा समावेश आहे. राष्ट्रवादी अजित पवार गटाची मते आणि भाजपसोबत असलेली आमची मैत्री यामुळे सुनेत्रा पवार प्रचंड मतांनी विजयी होतील’, असेही मुश्रीफ म्हणाले.

‘कोल्हापूरच्या दोन्ही जागा मुख्यमंत्री एकनाथ शिंदे यांच्या नेतृत्वाखालील शिवसेनेच्या आहेत. त्यावर विद्यमान खासदारांनाच उमेदवारी मिळेल’, असे सांगून मुश्रीफ म्हणाले,‘कोल्हापूर लोकसभेसाठी समरजित घाटगे यांचे नाव माझ्या कानावर आजपर्यंत आले नाही. परंतु तिन्ही पक्ष मिळून जे ठरवतील त्याच्याशी मी बांधील आहे. माझ्यासंदर्भात ईडी चौकशी झाली, मात्र या कंपन्यांशी माझा कुठलाही संबंध नाही. आमदार प्रसाद लाड यांनी याचा खुलासा केलेला आहे.’