कोल्हापूर : ‘कोणत्याही पक्षाच्या पाठबळाशिवाय लोकसभा निवडणूक (Kolhapur Lok Sabha) लढवणे अवघड असते. सांगलीतील लोकसभेची जागा काँग्रेसला (Congress) जाईल आणि कोल्हापूरची जागा शिवसेनेला मिळेल व आपल्याला संधी मिळेल या आशेवर होतो. मात्र, हे शक्य झाले नाही, त्यामुळे लोकसभेसाठी भरलेला निवडणुकीचा अर्ज मागे घेत असल्याची माहिती ‘गोकुळ’चे संचालक डॉ. चेतन नरके (Chetan Narake​) यांनी पत्रकार परिषदेत दिली.

ही माघार नव्हे तर नवी सुरूवात असल्याचे सांगतानाच त्यांनी कवी सुरेश भट (Suresh Bhat) यांची ‘विझलो जरी मी, हा माझा अंत नाही’ ही कविताच वाचून दाखवली. दरम्यान, महायुतीच्या उमेदवारांना पाठिंबा देण्याबाबत मुख्यमंत्री एकनाथ शिंदे (Eknath Shinde) यांचाही फोन सकाळी आला होता. याबाबत सर्व कार्यकर्त्यांना घेऊन निर्णय घेतला जाईल. कोणाला पाठिंबा द्यावा याबाबत विचार केला जाईल, असे नरके यांनी सांगितले.

नरके म्हणाले, ‘लोकसभा निवडणुकीतून माघार घेत आहे. मात्र, या निवडणुकीत कोणत्या राजकीय पक्ष किंवा उमेदवाराला अजून समर्थन दिलेले नाही. युवकांना स्वयंरोजगाराच्या संधी उपलब्ध करून देण्यासाठी चेतन युवा सेतू संस्थेची स्थापना केली जाणार आहे. थायलंडसह अनेक देशांसोबत सामंजस्य कराराच्या माध्यमातून फौंड्रीसह उद्योगाला चालना देण्यासाठी प्रयत्नशील राहीन.

कोल्हापुरात मोठ्या संधी असल्याचे ठळकपणे जाणवले. मात्र, राजकीय उदासीनता, प्रबोधन आणि अभ्यासाची कमतरता, योग्य मार्गदर्शन आणि पाठपुरावा नसल्यानेच येथे औद्योगिक, पर्यावरणीय, रोजगार आणि सामाजिक समस्या दिवसेंदिवस वाढत आहेत.’