देहू : मावळचे विद्यमान खासदार आणि आगामी लोकसभा निवडणुकीचे युतीचे उमेदवार श्रीरंग बारणे तसेच राष्ट्रवादी काँग्रेसचे लोकसभेचे उमेदवार पार्थ पवार हे शुक्रवारी (ता. 22) समोरासमोर आले. निमित्त होते जगतगुरु श्री संत तुकाराम महाराज यांच्या वैकुंठगमन बीजोत्सव सोहळ्याचे. तुकोबांचे दर्शन घेण्यासाठी दोघेही मंदिरात एकमेकांच्या समोरा-समोर आले आणि हे फोटो सोशल मीडियावर व्हायरल झाले.

नुकतीच काही वेळापूर्वी शिवसेनेची पहिली यादी जाहीर झाली आहे. पुन्हा एकदा श्रीरंग बारणे मावळमधून खासदारकीसाठी उभे राहतील. तर बऱ्याचे चर्चेअंती राष्ट्रवादीकडून मावळ मतदारसंघात पार्थ पवार हे उभे राहणार आहेत. त्यामुळे दोन उमेदवारांचे निवडणुकीपूर्वीचे हे दुर्मिळ चित्र पहिल्यांदाच बघायला मिळाले आहे. तसेच बारणे यांनी पालखीची पूजा केली. दोघांनीही एकाद वेळी तुकोबांच्या चरणी एकाच वेळेस जाणे म्हणजे योगायोगच समजावा. 

संत तुकाराम महाराजांचा 371 बीजसोहळा मोठ्या उत्साहात आणि परंपरेनुसार देहूच्या इंद्रायणी नदीच्या तीरावर पार पडला. राज्याच्या कानाकोपऱ्यातून सुमारे दोन लाख भाविक या सोहळ्याला उपस्थित होते.