नवी दिल्ली : महाराष्ट्रात झालेल्या सत्तांतरानंतर ३० जूनला मुख्यंत्री आणि उपमुख्यमंत्र्यांनी शपथ घेतली मात्र त्यानंतर अद्यापही शिंदे-फडणवीस सरकारमध्ये मंत्रिमंडळाचा विस्तार झालेला नाही. या पार्श्वभूमिवर शिंदे गटातील नेते अब्दुल सत्तार दिल्लीत दाखल झाले असून त्यांनी आज एका वृत्तवाहिनीला बोलातना येत्या ३ तारखेपर्यंत राज्यात मंत्रिमडळाचा विस्तार होईल असे म्हटले आहे.

दरम्यान राज्यातील मंत्रिमंडळाचा विस्तार का रखडला आहे? या प्रश्नाचे उत्तर देताना सत्तार म्हणाले की, महाराष्ट्रात सध्याच्या परिस्थितीत मुख्यमंत्री उपमुख्यमंत्री यांच्यात कदाचीत वाटाघाटी झाली असेल असे मला वाटतं. पण अंतिम निर्णय अद्याप झाला नाही. मला वाटतं की दोन दिवसांत अंतिम निर्णय होईल आणि तीन तारखेच्या आत शपथविधी होईल. मला वाटतं की तीन तारखेच्या आत शंभर नव्हे एकशे एक टक्के शपथविधी होईल असे सत्तार यावेळी म्हणाले.

सुप्रीम कोर्टाच्या निर्णयामुळे मंत्रिमंडळाचा विस्तार रखडला आहे का? यावर बोलताना सत्तार म्हणाले की, सुप्रिम कोर्टाचा आणि याचा काही संबंध नाही, सुप्रीम कोर्ट जे निर्णय देईल तो सर्वांना मान्य असेल, पण एक तारखेला सुनावणी होणार आहे, वकिल म्हणणं मांडतील त्यानंतर काय तो निर्णय घेतला जाईल, जो सर्वांना मान्य असेल असेही सत्तार यांनी म्हटले.

मंत्रिपद मिळेल असं वाटतंय का? या प्रश्नाला उत्तर देतान सत्तार म्हणाले की, मुख्यमंत्री-उपमुख्यमंत्री जे निर्णय घेतात त्यामध्ये काही अडचणी येतात, त्या पाहून राज्यामध्ये मला मंत्री करण्यात काही अडचणी येत असतील तर ते निर्णय घेतील. मी कोणतीही अट न ठेवता शिंदे गटात सामील झालो आहे. मंत्रिपदाबद्दल बोलायचे झाले तर, मी तीन वेळा मंत्री होतो, असे सत्तार यावेळी म्हणाले.