लोकसभा 2019 : मुंबई- युवासेनेचे अध्यक्ष व शिवसेनेचे नेते आदित्य ठाकरे हे लोकसभा निवडणुकीच्या रिंगणात उतरण्याची दाट शक्यता वर्तविण्यात येत आहे. आदित्य हे मुंबई उत्तर-मध्य मतदारसंघातून निवडणूक लढवण्याची शकत्या असून या मतदारसंघात भाजपच्या पूनम महाजन विद्यमान खासदार आहेत. ही जागा आदित्य यांच्यासाठी अधिक सुरक्षित असल्याचे सांगण्यात येत असून शिवसैनिकांचीही अदित्य यांनी जनतेतून निवडणुक लढवावी ही इच्छा आहे.

त्याचबरोबर उत्तर-पश्चिमम मुंबई मतदार संघाचाही विचार चालू असल्याचे बोलले जात आहे. सध्या शिवसेनेचे गजानन कीर्तिकर विद्यमान खासदार आहेत. निवडणुकीच्या राजकारणापासून मी स्वत:ला कधीही दूर ठेवलेले नाही. गरज असेल तेव्हा मी लढेन. लोकप्रतिनिधी म्हणून मोठे काम करता येऊ शकते. माझे आजोबा शिवसेनाप्रमुख बाळासाहेब ठाकरे वा माझे वडील उद्धव ठाकरे यांनी कधीही निवडणूक लढविली नाही पण, त्यांनी कुटुंबातील इतरांवर ते मत कधीही लादलेले नव्हते, असे आदित्य ठाकरे यांनी मुंबई महापालिका निवडणुकीपूर्वी दिलेल्या एका मुलाखतीत म्हटले होते. 

आदित्य यांनी आजवर कोणतीही राजकीय निवडणूक लढविली नसली तरी, मुंबई जिल्हा फुटबॉल असोशिएशनच्या अध्यक्षपदी ते निवडून आले आहेत, त्यामुळे लोकसभेची निवडणुक लढवण्याची त्यांची शक्यता नाकारता येत नाही. दरम्यान, याबाबत शिवसेनेकडून कुठल्याही प्रकारचे अधिकृत वृत्त आलेले नाही.