पुणे - किमान तापमानात घट होत असल्याने थंडीचा कडाका वाढू लागला आहे. राज्यात सर्वांत कमी तापमान नगर येथे १२.६ अंश सेल्सिअस नोंदले गेले. मराठवाडा आणि विदर्भातही अनेक ठिकाणी पारा १५ अंशांच्याखाली गेला; तर पुण्यात मात्र अंशतः ढगाळ हवामानामुळे मागील तीन दिवसांच्या तुलनेत बुधवारी दुपारच्या तापमानात वाढ झाली होती.

मंगळवारच्या तुलनेत किमान तापमान ०.३ अंश सेल्सिअसने वाढून ते १५.६ अंश सेल्सिअस इतके झाले. कमाल तापमान एक अंश सेल्सिअसने वाढून ते ३०.८ अंश सेल्सिअसवर गेले होते.

लोहगाव येथे किमान तापमान १६.८ अंश सेल्सिअस नोंदविले गेले. शहर आणि शहर परिसराप्रमाणेच मध्य महाराष्ट्रातही किमान तापमान सरासरीपेक्षा किंचित वाढल्याचे हवामान खात्याने म्हटले आहे; तसेच पुढील २४ तास आकाश अंशतः ढगाळ असेल. त्यामुळे किमान तापमानात किंचित वाढ होईल. उद्या (ता. २१) किमान तापमान १७ अंश सेल्सिअस आणि कमाल तापमान ३० अंश सेल्सिअस असेल, असे हवामान खात्याने म्हटले आहे.