महाविकास आघाडीची नागपूरात दुसरी वज्रमुठ सभा पार पडणार आहे. दरम्यान, अजित पवार या सभेत बोलणार का? असा सवाल राजकीय वर्तुळात उपस्थित होत आहे. अशातच विरोधी पक्षनेते अजित पवार यांनी माध्यमांशी बोलताना उपस्थित झालेल्या प्रश्नावर मौन सोडले आहे. त्यांनी भाषण करणार नसल्याचे स्पष्ट केलं आहे. त्यामुळे राजकीय वर्तुळात उलट सुलट चर्चा रंगल्या आहेत. (Ajit Pawar big statement not speech in Mahavikas Aghadi Vajramuth Sabha nagpur )

अजित पवार नागपुरमध्ये माध्यमांशी संवाद साधत होते. यावेळी त्यांनी संध्याकाळी होणाऱ्या सभेवर भाष्य केलं. तसेच ते सभेदरम्यान भाषण करणार नसल्याचे स्पष्ट करत यामागचे कारणदेखील त्यांनी यावेळी सांगितलं.

म्हणून अजित पवार भाषण करणार नाहीत

नागपूर सभेनंतर नाशिक आणि कोल्हापूर येथे वज्रमुठ सभा पार पडणार आहे. माझ्यासंदर्भात उलटसुलट चर्चा सुरु आहेत. मी भाषण करणार की नाही अने प्रश्न उपस्थित होतायत. तर प्रत्येक पक्षाच्या दोन मान्यवरांनी भाषण करायचं असं ठरलं आहे. कोणी दोघांनी करायचं ते पक्षान ठरवायचं आहे.

मागे झालेल्या सभेत काँग्रेसकडून बाळासाहेब थोरात आणि अशोक चव्हाण, शिवसेनाकडून उद्धव ठाकरे आणि चंद्रकांत खैरे आणि राष्ट्रवादीकडून मी आणि धनंजय मुंडे यांनी भाषण केलं होतं.

तर आजच्या सभेत आमच्या तर्फे जयंत पाटील आणि अनिल देशमुख भाषण करणार आहेत. देशमुख हे विदर्भातील आहेत. पाटील हे पक्षाचे प्रांतध्यक्ष आहेत. नाना पटोले आणि सुधीर केदार हे बहुतेक भाषण करतील. मर्यादीत वेळेत भाषण जनतेला ऐकायला मिळावं हे या मागचा हेतु आहे. असही पवार यांनी यावेळी स्पष्ट केलं.

गेल्या अनेक दिवसांपासून राष्ट्रवादी फुटीच्या उंबरठ्यावर असल्याची चर्चा सुरू आहे. अजित पवार हे भाजपसोबत जाणार असल्याच्या बातम्या समोर येत आहेत. याच पार्श्वभूमीवर अजित पवार हे या सभेत बोलणार का? काय बोलणार? असे अनेक सवाल उपस्थित होतायत.