अलिबाग : परळहून अलिबागला (Alibaug) एसटी घेऊन येणाऱ्या चालकाला (ST bus driver) कार्ले खिंडीत दोन अज्ञात व्यक्तींनी मारहाण (beating case) केली. त्यानंतर अलिबाग एसटी स्थानकात (Alibaug ST bus depot) आंदोलनकर्त्यांनी चालकाला बांगड्या घालून चालकाचा निषेध केला. ही घटना सोमवारी सकाळी पावणेनऊ ते साडेनऊ या दरम्यान घडली. याप्रकरणी अलिबाग पोलीस ठाण्यात सहा जणांविरोधात गुन्हा दाखल (Police FIR) करण्यात आला.

एसटी कर्मचाऱ्यांनी त्यांच्या मागण्यांसाठी संप पुकारला होता; तरीदेखील परळ आगारातील एसटीचालक काशिनाथ गायकवाड हे सोमवारी सकाळी सहा वाजता, वाहकांसमवेत प्रवासी घेऊन अलिबागकडे निघाले. अलिबाग-पेण मार्गावरील कार्ले खिंड येथे आल्यावर उतरणाऱ्या प्रवाशांसाठी बस थांबविण्यात आली. त्याच वेळी दोन अज्ञात व्यक्ती एसटीमध्ये घुसल्या. त्यांनी चालकाला धक्काबुक्कीसह मारहाण करून शिवीगाळ केली. त्या वेळी चालकाने काहीही वाद न घालता एसटी अलिबाग एसटी बस स्थानकात आणली.

प्रवासी उतरल्यानंतर पुन्हा एसटी परळला जाण्यासाठी निघाली. दरम्यान संपावर असलेल्या काही एसटी कर्मचाऱ्यांनी आक्रमक भूमिका घेत चालकासह वाहकाच्या गळ्यात हार घातला. चालकाला बांगड्या घालून त्याचा निषेध केला. या प्रकारामुळे एसटीचालकासह वाहकाने अलिबाग पोलिस ठाणे गाठले. कार्ले खिंड व स्थानकात झालेल्या या प्रकाराबाबत चालक गायकवाड यांनी सहा जणांविरोधात तक्रार दाखल केली.