कऱ्हाड (जि. सातारा) : मी मुख्यमंत्री असताना मराठा समाजाला दिलेले आरक्षण हे व्यावहारिकदृष्ट्या योग्य होते; पण पुढे आलेल्या देवेंद्र फडणवीस यांच्या सरकारला ते टिकवता आले नाही. मराठा आरक्षणाचा प्रश्न सोडवण्यासाठी राज्यातील सर्वपक्षीय नेत्यांनी एकत्रित येऊन पंतप्रधान नरेंद्र मोदी (Narendra Modi) यांना भेटले पाहिजे. त्यांच्यासमोर त्यासंदर्भातील योग्य मांडणी केल्याशिवाय हा प्रश्न सुटणार नाही, असे मत माजी मुख्यमंत्री आमदार पृथ्वीराज चव्हाण यांनी व्यक्त केले.

आमदार चव्हाण (Prithviraj Chavan) यांनी त्यांच्या निवासस्थानी दिवाळीनिमित्ताने फराळाचे आयोजन केले होते. त्‍यावेळी पत्रकारांशी अनौपचारिक गप्पा मारताना ते बोलत होते. चव्‍हाण म्‍हणाले, ‘‘दिवाळीनिमित्त राष्ट्रवादी काँग्रेसचे अध्यक्ष, खासदार शरद पवार आणि उपमुख्यमंत्री अजित पवार भेटले; पण पवारांचे घरातल्या घरात नेमकं काय चाललंय, हे समजत नाही. त्यांच्या राजकीय भूमिकेबाबत विश्‍‍लेषण करणारा अजून जन्मायचा आहे.’’

तुम्ही लोकसभा निवडणूक लढणार का? याबाबत विचारले असता चव्हाण म्हणाले, ‘‘अजून आमच्या आघाडीत कोण कोणती जागा लढवणार, हे निश्चित नाही. ते पहिल्यांदा ठरले पाहिजे. महाविकास आघाडीत जो निर्णय होईल त्यावर पुढील दिशा ठरेल.’’

वडेट्टीवारांची भूमिका वैयक्तिक

काँग्रेसचे नेते, विरोधी पक्षनेते विजय वडेट्टीवार यांनी मराठा आरक्षणाविषयी (Maratha Reservation) मांडलेली भूमिका ही त्यांची वैयक्तिक आहे. ती काँग्रेस पक्षाची भूमिका नाही, असेही चव्‍हाण यावेळी म्‍हणाले.

विरोधकांची एकजूट गरजेची

राम मंदिर जरी बांधून झाले असले तरी त्याचा येणाऱ्या लोकसभा निवडणुकीत मतासाठी फायदा होईल, असे पंतप्रधान नरेंद्र मोदींना वाटत नाही. म्हणूनच जातीय तेढ निर्माण करण्याचा भाजप वेगवेगळ्या मार्गाने प्रयत्न करीत आहे. सध्या देशात भाजप विरोधात वातावरण आहे; पण त्याचा फायदा घेण्यासाठी विरोधकांची एकजूट तितकीच गरजेची आहे, अशी अपेक्षा आमदार चव्हाण यांनी व्यक्त केली.