मुंबई - सिंधुदुर्ग विमानतळावरून १ फेब्रुवारीपासून अलायन्स एअरची दुसरी विमानसेवा सुरू करण्यात येणार आहे. मुंबईसोबतच आता हैद्राबाद, म्हैसूर ही महत्वाची शहरे सिंधुदुर्गला विमानसेवेने जोडली जाणार आहे. आठवड्यातून दोन वेळा ही सेवा उपलब्ध होणार आहे.

हैद्राबाद - म्हैसुर - सिंधुदुर्ग- म्हैसूर - हैद्राबाद या दुसऱ्या विमानसेवेचा प्रारंभ करण्यात आला आहे. सुरूवातीच्या काळात दर बुधवारी आणि रविवारी अशी आठवड्यातून दोन दिवस ही सेवा प्रवाशांसाठी उपलब्ध असणार आहे. या सेवेमुळे सिंधुदुर्ग जिल्हा हा पूर्वेस हैद्राबाद आणि दक्षिणेस म्हैसूर या देशातील अत्यंत महत्वाच्या शहरांशी विमानसेवेने जोडला जाणार आहे.

या सेवेच्या निमित्ताने विमान प्रत्येक बुधवारी हैद्राबाद येथून निघून म्हैसूर मार्गे सायंकाळी ५.३० वाजता सिंधुदुर्ग विमानतळावर उतरेल. तर सायंकाळी ६ वाजता म्हैसूर मार्गे हैद्राबादकरिता उड्डाण करेल. तर दर रविवारी हैद्राबाद येथून निघून म्हैसूर मार्गे सायंकाळी ५.३० वाजता सिंधुदुर्ग विमानतळावर उतरेल. तसेच सायंकाळी ६.३० वाजता म्हैसूर मार्गे हैद्राबादसाठी उड्डाण करेल.