अमृता फडणवीस ब्लॅकमेलिंग प्रकरण गेल्या काही दिवसांपासून चांगलंच चर्चेत आहे. या प्रकरणी मुंबई पोलिसांनी डिझायनर अनिक्षा जयसिंघानी आणि तिचे वडील अनिल जयसिंघानी यांना अटक केली असून या प्रकरणाची सुनावणी सुरू आहे. यामध्ये वकिलाने एक खळबळजनक दावा केला आहे.

कोर्टात अनिल जयसिंघानी यांची बाजू विरेंद्र खन्ना मांडत आहेत. त्यांनी काही महत्त्वाच्या गोष्टी या प्रकरणात मांडल्या आहेत. कशासाठी १० कोटी खंडणी मागितली याचा कुठेही उल्लेख करण्यात आलेला नाही, असं खन्ना म्हणाले आहेत. शिवाय ज्या फोनवरुन दोघांमध्ये संभाषण झाल्याचं सांगण्यात येत आहे, तो फोन दोन दिवस बंद होता आणि आरोपी पोलिसांच्या ताब्यात होते.

गुन्हा दाखल झाल्यानंतरही अमृता फडणवीस अनिक्षाला तीन वेळा एका पंचतारांकित हॉटेलमध्ये भेटल्याचं वकील खन्ना यांनी म्हटलं आहे.