मुंबई : राज्य परिवहन महामंडळातील (Maharashtra transport corporation) इटीआयएम मशिनच्या (ETIM machine) कंत्राटात परिवहन मंत्री अनिल परब (anil parab) आणि एसटी महामंडळाच्या (st corporation) वरिष्ठ अधिकाऱ्यांनी संगनमत करून 250 कोटींचा आर्थिक भ्रष्टाचार केल्याचा (250 crore scam) आरोप भाजपचे आमदार मिहीर कोटेचा (mihir kotecha) यांनी राज्यपालांकडे (governor) केली होती. त्यानंतर आता राज्यपाल यांचे आदेशानुसार प्रभारी लोक आयुक्त यांनी चौकशी (lokayukta investigation) सुरू केली असून, 2 सप्टेंबर रोजी ऑनलाईन पद्धतीने सुनावणी ठेवण्यात आली आहे.

परिवहन मंत्री अनिल परब यांच्यावर नुकतेच परिवहन विभागातील बदल्यांमध्ये अधिकाऱ्यांशी संगनमत ठेऊन कोटींचा भ्रष्टाचार केल्याचा आरोप खुद्द परिवहन विभागातच एका निलंबित अधिकाऱ्याने केला होता. त्यांनतर आता एसटी महामंडळातील इटीआयएम मशीनच्या कंत्राट प्रकरणात भाजपा आमदाराने 250 कोटींचा भ्रष्टाचाराचा आरोप केला असून, राज्यपालांनी यासबंधीत चौकशीचे आदेश लोकायुक्तांना दिले आहे.

त्यानुसार आता लोकायुक्तांनी आमदार मिहीर कोटेचा यांना सूनावणीची नोटीस पाठवली असून 2 सप्टेंबर रोजी गुगल मिट पद्धतीने ही सुनावणी पार पडणार असल्याचे कळविण्यात आले आहे. राज्यपालांनाकडे तक्रार केल्यानंतर आता लोकयुक्तांच्या चौकशीमध्ये आपल्याला न्याय मिळेल अशी अपेक्षा असल्याचे आमदार मिहीर कोटेचा यांनी सांगितले.