उरण : पनवेल तालुक्‍यातील न्हावा गावातील एका दुकानदारावर कोयत्याने हल्ला करून त्याला जीवे मारण्याचा प्रयत्न करणाऱ्या आरोपीस न्हावा-शेवा पोलिसांनी अटक केली आहे. नारायण काशिनाथ पाटील (५५) असे दुकानदाराचे नाव असून पोलिसांनी आरोपी सुशांत ठाकूर (३०) याला अटक करून त्याच्यावर गुन्हा दाखल केला आहे.

आरोपी सुशांत ठाकूर याने फिर्यादी नारायण पाटील यांच्या न्हावा गावातील मालकीच्या साई बेकरीमध्ये शनिवारी दुपारी ४.३० च्या सुमारास बेकरीच्या गल्ल्यातील पैसे जबरदस्तीने मागितले, त्यावर पाटील यांनी पैसे देण्यास नकार दिल्याने आरोपी ठाकूरने त्यांच्यावर धारदार लोखंडी कोयत्याने वार करून जीवे मारण्याचा प्रयत्न केला. याप्रकरणी न्हावा-शेवा पोलिसांनी आरोपी सुशांत ठाकूर याच्याविरुद्ध भा.दं.वि. ३०७ कलमान्वये गुन्हा दाखल केला आहे.